Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 432 Hüküm no: 441 Orijinal metin no: [107a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin üç adet saka gediğini satın aldığı Mahmiye-i İstanbul’da Mustafa Paşa Hamamı kurbünde Molla Hüsrev mahâllesi ahâlîsinden Mustafa Çelebi b. Ali mahmiye-i mezbûrede meclis-i şer‘de işbu râfi‘ü’l-vesîka Receb b. Ömer nâm kimesne mahzarında ikrâr-ı tam ve takrîr-i kelâm edip işbu mezbûr Receb mahmiye-i mezbûrede Ayazma kapısı dâhilinde ekmekçi fırını mukābelesinde vâki‘ çeşmeden taht-ı tasarrufunda olan üç aded arka suyu gediğini târîh-i kitâbdan iki sene mukaddem bana iki yüz on beş guruş bedel mukābelesinde bana ferâğ ve tefvîz ben dahi ba‘de’l-kabûl bedel-i mezbûru yedimden tamâmen ahz u kabz etmişidi hâlâ zikr olunan üç gediği yine mezbûr Receb ferâğ ve tefvîz edip merkūm Receb dahi bedel olmak üzere makbûzu olan meblağ-ı mezbûr iki yüz on beş guruşu bana redd ü teslîm ben dahi yedinden ahz u kabz eylediğimden sonra ber-vech-i muharrer medfû‘um olan bedel-i merkūm iki yüz on beş guruşa ve zikr olunan üç aded sakā gediğine ve gayra müte‘allıka âmme-i da‘vâ ve kâffe-i mütâlebâtdan mezbûr Receb’in zimmetini ibrâ ve iskāt eyledim min-ba‘d zikri mürûr eden üç aded sakā gediğinde benim vechen mine’l-vücûh ve sebeben mine’l-esbâb aslâ alâka ve medhalim kalmayıp kemâ-fi’l-evvel mezbûr Receb’in yedinde ve taht-ı tasarrufundadır keyfe mâ [yeşâ] ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Sakabaşı Mehmed Ağa b. Mustafa, eş-Şeyh Mehmed b. Ali, Hüseyin Beşe b. Ali, Ma‘den Beşe es-saka, Ali Efendi b. Ahmed, el-Hâc Mehmed Efendi b. Ahmed, İsmail Efendi b. el-Hâc Siyavuş.