Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 432 Hüküm no: 442 Orijinal metin no: [107a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Diyenoz v. Ariton’un, Haçador v. Toros’da olan alacak davası Ekmekci tâifesinden işbu râfi‘ü’l-vesîka Dipenoz v. Ariton nâm zimmî mahmiye-i İstanbul’da meclis-i şer‘-i hatîrde Haçador v. Toros nâm zimmî muvâcehesinde üzerine da‘vâ ve takrîr-i kelâm edip Haçador zimmetinde işbu yedimde olan deyn temessükü mantûkunca cihet-i karz-ı şer‘îden altmış guruş hakkım olup hattâ mezbûr Haçador cihet-i mezbûreden zimmetinde bana ol mikdâr guruş deyni olduğunu şuhûd mahzarında ikrâr ve i‘tirâf etmekle hâlâ meblağ-ı merkūmu mezbûr Haçador’dan taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Haçador cevâbında fi’l-hakīka müdde‘î-i mezbûra altmış guruş deynim olmak üzere ikrâr ve yedine temessük dahi vermiş idim, lâkin hakīkatde müdde‘î-i mezbûra ancak on guruş deynim olub elli guruşu kâziben ikrâr etmiş idim, dedikde fi’l-vâki‘ merkūm Haçador elli guruş deyn ikrârında kâzib olmayıp ve kendi dahi da‘vâsında mübtıl olmadığına müdde‘î-i mezbûra yemîn teklîf olundukda ol dahi alâ-vefkı’l-mesûl yemîn billâhillezî enzele’l-İncîle alâ-îsâ -aleyhi’s-selâm- etmeğin mûcibince meblağ-ı mezbûr altmış guruşu müdde‘î-i mezbûra edâ ve teslîme merkūm Haçadora tenbîh birle mâ-vaka‘a bi’t-taleb ketb olundu. Fi’l-yevmi’-ışrîn min- Cemâziyelâhire li-sene sitte aşere ve mi’e ve elf. Şuhûdü’l-hâl: Mehmed Efendi el-kādı, el-Hâc Mustafa Efendi el-kādı, Mehmed Emin Efendi el-kâtib, Mehmed b. Şaban muhzırbaşı, Ömer Efendi el-kâtib, el-Hâc Yusuf b. Osman el-muhzır ve gayruhum.