Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 433 Hüküm no: 443 Orijinal metin no: [107b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin Harput’taki evini ve tarla hissesini Molla Halil’e satması Mahmiye-i İstanbul’da Zincirlikuyu kurbünde Alipaşa-i atik mahâllesi ahâlîsinden İbrahim Efendi b. Veli nâm kimesne mahmiye-i mezbûrede meclis-i şer‘-i enverde işbu bâ‘isü’l-vesîka Molla Halil b. Veli nâm kimesne tarafından husûs-ı âti’l-beyanı tasdîka vekîl-i şer‘îsi olan Ali Efendi b. el-Hâc Osman nâm kimsene mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup vilâyet-i Anadolu’da Harput kasabasında Sara Hatun mahâllesinde vâki‘ bir tarafdan müşterî-i mezbûr mülkü ve bir tarafdan Kör İsmail nâm kimesne mülkü ve iki tarafdan tarîk-i âm ile mahdûd fevkānî iki bâb oda ve eyvân ta‘bîr olunur bir sofa ve tahtânî bir ahır ve bir sofa ve samanlık ve kenîfi müştemil menzili ve menzil-i mezkûrun içinde mevcûd sagīr kazgan ve dört sagīr sahan ve bir leygen [leğen] ve yine kazâ-i mezbûra tâbi‘ Markin nâhiyesinde Fetih bâb nâm mevzi‘de vâki‘ ma‘lûmü’l-hudûd on dönüm bağda olan nısf hissemi safkatin vâhidetin ve tarafeynden îcâb ve kabûlü hâviye bey‘-i kat‘î-i mu‘teber ile müvekkil-i mezbûr Molla Halil’e otuz guruşa bey‘ ve temlîk ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr otuz guruşu müvekkil-i mezbûr bana def‘ ü teslîm ben dahi yedinden tamâmen ahz u kabz eyleyip mahâllerinde zabt ve kabza müvekkil-i merkūmu taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Cemâziyelâhire li-sene sitte aşere ve mi’e ve elf. Şuhûdü’l-hâl: Ahmed Çelebi b. Mehmed, Mustafa Çelebi b. Ali, Molla Ahmed b. Ali. Hasan Ağa [b.] Mütevellî Hüseyin, Veliyüddin Efendi el-kādı, İsmail Çelebi.