Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 434 Hüküm no: 445 Orijinal metin no: [107b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimetoka’da âdet-i ağnâm vergisinin yarısına malikâne olarak mutasarrıf olan Yakub Ağa’nın hissesini Ahmed Ağa’ya devretmesi Mahmiye-i İstanbul’da Küçükmustafapaşa mahâllesi sâkinlerinden olup vilâyet-i Rumeli’nde Dimetoka kazâsının mukāta‘a-i âdet-i ağnâmı nısfına ber-vech-i mâlikâne [ve] te’bîd bâ-berat-ı âlişân mutasarrıf olan Yakub Ağa b. Ahmed nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde işbu râfi‘ü’l-vesîka Ahmed Ağa b. Abdullah nâm kimesne mahzarında ikrâr ve takrîr-i kelâm edip zikr olunan Dimetoka kasabasının âdet-i ağnâmı mukāta‘âsı ber-vech-i mâlikâne [108a] ve te’bîd bâ-berat-ı âlişân iştirâk üzere benimle gāib ani’l-meclis Osman Efendi b. İsmail nâm kimesne tasarrufunda olmağıla ber-vech-i muharrer mutasarrıf olduğum nısf âdet-i ağnâm mukāta‘asını beher sene malın ve kalemiyesin mahâllinde teslîm etmek üzere ferâğ-ı mu‘teber-i kat‘î ile mezbûr Ahmed Ağa’ya dört yüz guruş bedel-i makbûz mukābelesinde ferâğ ve tefvîz ol dahi makbûz ve kabûl etmek ile ba‘de’l-yevm zikr olunan nısf âdet-i ağnâm mukāta‘asında benim kat‘â alâka ve medhalim kalmayıp mezbûr Ahmed Ağa’nın dâhil-i havza-i tasarrufu olmuşdur, dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Mustafa b. Şa‘bân, Mehmed Bey b. Bâyezid, İbrahim b. Ahmed, Osman Efendi b. İsmail, Ahmed Efendi b. İmam-ı Erdek, Mustafa Çavuş.