Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 435 Hüküm no: 446 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zü’amâdan Hızır Ağa’nın Badracık ve Yaçağaç kazalarında bazı zimmilerden aldığı parayı ödeme taahhüdü Vilâyet-i Rumeli’nde Badracık kazâsı ahâlîsinden ve zü‘amâdan Hızır Ağa b. Mehmed nâm kimesne mahmiye-i İstanbul’da meclis-i şer‘-i enverde Badracık ve Yaçağaç? kazâları ahâlîlerinden işbu ashâbü’l-kitâb Tarandafile v. Kosto ve İstati v. Zafiri ve Nikola v. Lumi ve Papa Dimo v. Zizo ve Rako v. Boro ve Dimo v. Yorgi ve İstoyo v. Yani ve Diko v. Franko ve Todori v. Dimo ve Yorgo v. Todori nâm zimmîler muvâcehesinde ikrâr-ı tam ve takrîr-i kelâm edip zimmiyyûn-ı mezbûrûn mallarından bana bin iki yüz yirmi guruş ikrâz ve teslîm ben dahi yedlerinden istikrâz ve kabz ve kendi masârıfıma sarfla ba‘de’l-istihlâk meblağ-ı mezbûr bin iki yüz yirmi guruş zimmiyyûn-ı mezbûrûna zimmetimde vâcibü’l-edâ ve lâzimü’l-kazâ deynim olup meblağ-ı mezbûru târîh-i kitâbdan altmış bir gün tamâmına değin edâya ta‘ahhüd ve iltizâm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb [olundu.] Fi’l-yevmi’s-sânî ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Mustafa Ağa b. Ömer Üsküdarî, Mehmed b. Abdullah, Mustafa b. Ahmed, Berber Mehmed b. Mustafa, Hasan b. Mustafa.