Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 435 Hüküm no: 447 Orijinal metin no: [108a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yusuf’un Mehmed Çelebi’ye vermiş olduğu borcun zevcesi tarafından talep edilmesi Mahmiye-i İstanbul’da Kırkçeşme kurbünde Sekbânbaşı İbrahim Ağa mahâllesi ahâlîsinden iken bundan akdem fevt olan Navluncu Yusuf b. Abdullah nâm kimesnenin zevce-i metrûkesi işbu bâ‘isetü’l-kitâb Âişe bt. Abdullah nâm hatun mahmiye-i mezbûrede meclis-i şer‘-i enverde navluncu tâifesinden Mehmed Çelebi b. Ahmed mahzarında üzerine da‘vâ ve takrîr-i kelâm edip mezbûr Mehmed Çelebi zevcim müteveffâ-yı mezbûrun zimem-i nâsda olan hukūkundan ber-mûceb-i defter hayâtında yüz beş guruşunu bi’l-vekâle tahsîl ve ahz u kabz eyleyip hattâ ber-vech-i muharrer yüz beş guruşunu ahz u kabz eyleyip deyni olduğunu ikrâr ve i‘tirâf eylediğinden sonra kable’l-ahz zevcim mezbûr Yusuf fevt olmağla meblağ-ı mezbûrdan rub‘ hisse-i ırsiyemi taleb eylediğimde edâdan imtinâ‘ eder, suâl olunup alıverilmek matlûbumdur, dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden mahâlle-i mezbûre ahâlîsinden Süleyman Efendi b. Mehmed ve el-Hâc Mehmed b. el-Hâc Abbas nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu mezbûr Mehmed Çelebi müteveffâ-yı mezbûr Yusuf’un zimem-i nâsda olan hukūkundan bi’l-vekâle yüz beş guruşunu tahsîl ve ahz u kabz eyledim mezbûr Yusuf’a zimmetimde deynimdir deyü bizim huzûrumuzda ikrâr ve i‘tirâf eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcibince meblağ-ı mezbûr yüz beş guruşdan yirmi altı guruş ve bir rub‘ guruş hisse-i ırsiyesini [108b] müdde‘iye-i mezbûre Âişe Hatun’a edâ ve teslîme mezbûr Mehmed Çelebi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Hasan Efendi b. Mustafa, Ali Efendi el-kādı, İsmail Efendi Sandalcızâde, Süleyman b. Hasan, Veliyüddin Efendi el-kādı, Mustafa Çelebi, Mehmed Efendi el-kādı.