Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 436 Hüküm no: 448 Orijinal metin no: [108b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin vefat eden babasının kendisine hibe ettiği eşyaları talebi Mahmiye-i İstanbul’da Hoca Kasım Gönânî ahâlîsinden iken bundan akdem fevt olan Muharrem Çelebi b. Abdullah nâm kimesnenin verâseti zevce-i metrûkesi Rahime bt. Abdullah nâm hatun ile sulbî kebîr oğlu Mehmed Çelebi’ye münhasıra olduğu şer‘an zâhir oldukdan sonra mezbûr Mehmed Çelebi mahmiye-i mezbûrede meclis-i şer‘de râfi‘âtü’l-vesîka mezbûre Rahime tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân Mahmud b. Mustafa ve Ahmed b. Abdullah nâm kimesneler şehâdetleri ile şer‘an sâbit olan Ahmed Ağa b. Mustafa nâm kimesne mahzarında üzerine da‘vâ ve takrîr-i kelâm edip müvekkile-i mezbûre Rahime babam müteveffâ-yı mezbûra hayâtında eşyâsından bir kebîr bakır sini ve iki baklava tepsisi ve bir kebîr güğüm ve iki sagīr lengeri ve iki kahve ibriği ve iki şamdân ve bir lenger ma‘a ibrik ve iki lengeri ma‘a kapak ve altı aded sahan ve def‘a on iki aded sagīr ve kebîr sahan ve yedi aded lengeri ve iki seccâde ve üç aded minder ve beş aded yasdık ve bir orta keçesi ve iki aded yan keçesi ve bir ihrâm ve üç döşek ve beş aded yemenî yorgan ve iki kumaş yorgan ve bir seccâde ve def‘a dört aded sandal yorgan ve bir sîm bıçak ve bir balgamî sîm ön kuşak ve bir alaca kaftan ve üç kumaş antâri ve bir yeşil çukasını hibe-i sahîha-i şer‘iyye ile hibe ve temlîk ü teslîm ol dahi meclis-i hibede ittihâb ve kabz ve kabûl eyledikden sonra babam mezbûr Muharrem Çelebi fevt oldukda eşyâ-i mezkûrdan bana isâbet eden sekiz sehmden yedi sehim hisse-i ırsiyem alıverilmek matlûbumdur dedikde gıbbe’s-suâl vekîl-i mezbûr cevâbında fi’l-vâki‘ müvekkile-i mezbûre zevci müteveffâ-yı mezbûr Muharrem Çelebi’ye hayâtında zikr olunan eşyâyı hibe ve teslîm ol dahi [meclis-i] hibede ittihâb ve kabûl ve tesellüm eyledikden sonra ba‘de’l-vefât müvekkile-i mezbûre müdde‘î-i mezbûr ile ber-vech-i muharrer eşyâ-i mezkûreyi alâ-mâ-farazallâh beynlerinde iktisâm ve her biri hisse-i şer‘iyyelerin ahz u kabz edip husûs-ı mezbûra müte‘allıka âmme-i da‘vâdan mezbûr Mehmed Çelebi müvekkile-i mezbûrenin zimmetini ibrâ ve iskāt edip ol dahi mezbûr Mehmed Çelebi’nin zimmetini ibrâ ve iskāt etmiş idi, deyü def‘le mukābele edicek gıbbe’l-istintâk ve’l-inkâr vekîl-i mezbûr def‘-i mezkûruna beyyine taleb olundukda udûl-i ahrâr-ı ricâl-i Müslimînden ve Dülbendci Hü[sa]m mahâllesi ahâlîsinden Mahmud Çelebi b. Mustafa ve Mustafa Ağa b. Ali nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müvekkile-i mezbûre Rahime zevci müteveffâ-yı mezbûr Muharrem Çelebi b. Abdullah’a hayâtında hibe ve temlîk ü teslîm eylediği eşyâ-i mezkûreyi mezbûr Muharrem Çelebi’nin fevtinden sonra zevcesi müvekkile-i mezbûre oğlu müdde‘î-i merkūm ile bizim huzûrumuzda alâ-mâ-farazallâh beynlerinde iktisâm ve her biri hisse-i şer‘iyyelerin ahz u kabz eylediklerinden sonra husûs-ı mezkûra müte‘allıka âmme-i da‘vâdan mezbûr Mehmed Çelebi müvekkile-i mezbûrenin zimmetini ibrâ ve iskāt edip ol dahi merkūm Mehmed Çelebi’nin zimmetini ibrâ ve iskāt etmişidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm müvekkile-i mezbûreye müdde‘î-i merkūm bî-vech-i mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Mustafa b. Ahmed, Ahmed b. Abdullah, Mustafa Efendi b. Hacı Ali, Ahmed Çelebi b. Mustafa.