Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 437 Hüküm no: 449 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bender Kalesi Yeniçeri neferlerinin 1111 senesi Reşen ve Lezez mevacibleri Dergâh-ı âlî yeniçerilerinin elli dokuzuncu cemâ‘atine mahsûs oda neferâtının çorbacısı hâlâ Bender Kal‘ası ağası olan fahrü’l-akrân Mehmed Ağa b. Mustafa mahmiye-i İstanbul’da meclis-i şer‘-i hatîrde bi’l-fi‘il Dergâh-ı âlî yeniçerileri ağası olan iftihârü’l-emâcid ve’l-ekârim câmi‘u’l-mehâmid ve’l-mekârim zü’l-kadri’r-refî‘ ve’l-câhi’l-menî‘ Mehmed Ağa b. Mustafa ile kul kethüdâsı olan fahrü’l-eşbâh ve’l-a‘yân Yusuf Ağa b. Abdullah taraflarından husûs-ı âti’l-beyana vekîl olduğu Süleyman Ağa b. Abdurrahman ve Hüseyin Beşe b. Ahmed şehâdetleriyle şer‘an sâbit olan başyazıcı bâ‘isü’l-kitâb Ali Efendi b. Zekeriyya mahzarında ikrâr ve takrîr-i kelâm edip ben bin yüz on bir senesinde dahi kal‘a-i mezbûr ağası olup kal‘a-i mezbûre muhâfazasına memûr olan neferâtın sene-i mezbûre Reşen ve Lezez mevâciblerin on bin sekiz yüz elli guruşa bâliğ ve meblağ-ı mezbûrun iki bin üç yüz guruşu yine sene-i mezbûreye mahsûb [olmak] üzere Yanya cizyesi malından ve sekiz bin beş yüz elli guruşu dahi bin yüz on dört senesine mahsûb olmak üzere Maraş bedeli malından havâle olunup yedime iki kıt‘a sebeb-i tahrîr hükm-i hümâyûn verilmekle ben dahi meblağayn-i mezbûreyni cem‘îne memûr olanlardan ahz u kabza tarafımdan işbu hâzır bi’l-meclis elli beşinci cemâ‘at yoldaşlarından Abdurrahman Beşe b. Mehmed’i vekîl ve yedimde olan iki kıt‘a sebeb-i tahrîri mezbûra teslîm ol dahi vekâlet-i mezbûreyi kabûl ve sebeb-i tahrîrleri ba‘de’l-ahz meblağayn-i mezbûreynden Maraş bedeli malından havâle olunan meblağ-ı mezbûr sekiz bin beş yüz elli guruşdan cem‘ine memûr olandan bi’l-vekâle ancak altı yüz guruş kabz ve bana îsâl ve teslîm edip mâ‘adâsı olan yedi bin dokuz yüz elli guruş ile Yanya cizyesi malından havâle olunan iki bin üç yüz guruşun min-haysü’l-mecmû‘ on bin iki yüz elli guruşun tahsîli mümkün olmayıp neferât-ı mezkûreye verilmemekle meblağ-ı mezbûr on bin iki yüz elli guruş Ocak tarafından verilmek üzere yedime fermân-ı âlî ihsân olunmağın hâlâ ber-mûceb-i fermân-ı âlî müvekkilân-ı müşârün-ileyhimâ kendi mallarından tâife-i mezbûrenin sene-i mezbûrda mütehakkık oldukları zikr olunan Reşen ve Lezez mevâcibleri için meblağ-ı merkūm on bin iki yüz elli guruşu bana def‘ ü teslîm ben dahi ber-vech-i muharrer yedlerinden tamâmen ahz u kabz edip yedime verilen iki kıt‘a sebeb-i tahrîri işbu vekîl-i mûmâ-ileyhe teslîm ol dahi bi’l-vekâle yedimden ahz u kabz eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Fahrü’l-eşbâh İbrahim Ağa tâbi‘-i Sadr-ı âlî, İsmail Ağa tâbi‘-i Sadr-ı âlî, Fahrü’l-akrân Başçavuş İbrahim b. Ebubekir, Süleyman Ağa emîn-i beytülmal-ı Ocak, Mehmed Ağa kethüdâ-i Ağa-yı müşârün-ileyh, Küçük Çavuş Osman Ağa, Hüseyin Beşe b. Ahmed.