Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 438 Hüküm no: 450 Orijinal metin no: [109a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğin ahalisinden İshak Ağa b. İbrahim’in İbrahim Ağa b. Mehmed’den aldığı borcu ödeyeceğine dair taahhüdü Fi’l-asl vilâyet-i Anadolu’da Eğin kasabası ahâlîsinden olup mahmiye-i İstanbul’da Kadırga limanı kurbünde müsâfiren sâkin İshak Ağa b. İbrahim b. Abdurrahman nâm kimesne mahmiye-i mezbûrede meclis-i şer‘-i hatîrde mahmiye-i mezbûrede Âişe Sultân mahâllesi sâkinlerinden işbu bâ‘isü’l-vesîka İbrahim Ağa b. el-Hâc Mehmed mahzarında ikrâr ve takrîr-i kelâm edip mezkûr İbrahim Ağa kendi malından bana altı yüz elli guruş idâne ve teslîm ben dahi istidâne ve kabz edip meblağ-ı mezbûr altı yüz elli guruşu merkūm İbrahim Ağa’ya zimmetimde lâzımü’l-edâ ve vâcibü’l-kazâ deynim olmağın meblağ-ı mezbûru târîh-i kitâbdan yüz seksen bir gün tamâmına değin edâya ta‘ahhüd eyledim dedikde gıbbe’t-tasdîkı’ş-şer‘î mezbûr İshak Ağa meclis-i mezkûrda Ali Ağa b. Veli mahzarında i‘âde-i kelâm edip eğer meblağ-ı mezbûru müddet-i mezkûre tamâmına değin edâ etmezsem vilâyet-i Anadolu’da Eğin kazâsına tâbi‘ İrik nâm karyede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât çiftlik ta‘bîr olunur mülk menzilimin nısfı benim mülküm ve nısf-ı âharı karındaşım Ömer Ağa’nın mülkü olmağla çiftlik-i mezbûrda olan nısf hisse-i şâyi‘amı semen-i misliyle âhara bey‘ ve kabz-ı semene ve semeninden deyn-i mezbûru merkūm İbrahim Ağa’ya edâya ve fazla kalırsa bana îsâle mezbûr Ali Ağa’yı tarafımdan vekîl [ve] nâib-i menâb nasb u ta‘yîn eyledim dedikde ol dahi ber-vech-i muharrer vekâlet-i mezbûreyi kabûl ve hidemât-ı lâzimesini edâya ta‘ahhüd etmeğin hâzirûn bi’l-meclis olan karye-i mezbûre sükkânından Ahmed Beşe b. İbrahim ve Divriği kazâsına tâbi‘ Burunsuz karyesinden Bayram Ağa b. Mahmud ve Ali Ağa b. Veli nâm kimesneler ve Eğin kasabasından Manaksar v. Hanem merkūm [109b] İbrahim Ağa’nın mezbûr İshak Ağa zimmetinde ber-vech-i muharrer hakkı olan meblağ-ı mezbûr altı yüz elli guruşa her birimiz alâ-hıdetin emr u kabûlü hâviye kefâlet-i sahîha-i şer‘iyye ile kefil ve zâmin olmağın mâ-hüve’l-vâkî bi‘t-taleb ketb olundu. Fi’l-yevmi’l-hâmis ve’l-ışrîn min-Cemâziyelâhire li-sene sitte aşere ve mi’ete ve elf. Şuhûdü’l-hâl: Mustafa Ağa b. Ebubekir, Veli Bey b. Hüseyin, Mustafa Bey b. Ali, Mehmed Çelebi b. Bayram, Yusuf Ağa b. Hamza, Süleyman b. Abdullah, Yazıcı Mehmed Çelebi bakkāl, el-Hâc İbrahim Ağa bakkāl.