Bab Mahkemesi 54 Numaralı Sicil (H. 1102 / M. 1691) cilt: 20, sayfa: 376 Hüküm no: 457 Orijinal metin no: [80a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Çerkes Osman Ağa’nın icâreteynli vakıf evin satışı için Râziye bt. Abdullah’ı vekil tayin etmesi Mahmiye-i İstanbul’da Nahılbend mahallesinde sâkine olup on altı yaşını tekmîl eylediği zeyl-i kitâbda muharrerü’l-esâmi müslimîn şehâdetleriyle sâbit ve sinn ü cüssesinin bülûğa tahammülü olmağla bülûğunu mu‘terife ve reşîde idiği zâhir ve mütehakkik olan Fâtıma bt. Çerkes Osman Ağa ba‘de’t-ta‘rîfi’ş-şer‘î meclis-i şer‘-i şerîf-i enverde, işbu bâ‘isetü’l-kitâb Râziye bt. Abdullah nâm hâtun mahzarında takrîr-i kelâm ve ta‘bîr ani’l-merâm edip, mahalle-i mezbûrede vâki‘ bir tarafı Yusuf Efendi ve bir tarafı Ali Usta ve bir tarafı Kilerci Ali Çelebi mülkleri ve bir tarafı tarîk-i âm ile mahdûd menzil-i ma‘lûmü’l-hudûd merhûm Nahılbend el-Hâc Hasan Mescid-i Şerîfi Vakfı’na ayda on dört akçe ücret-i müeccele ile babam mezbûr Çerkes Osman Ağa’nın ile’l-vefât taht-ı tasarrufunda olup, ba‘de vefâtihî intikāl-i âdî ile bana intikāl etmişdi. Lâkin ben menzil-i mezbûru bâ-izn-i mütevellî âhara ferâğa âzime olup tâlibine arz için münâdî işbu Musa b. Mustafa’ya nidâ ve müzâyede etdirmekle, hâlâ menzil-i mezbûru bedel-i misli ile bâ-ma‘rifet-i mütevellî âhara ferâğ ve bedelini kabz ve bana îsâle ve husûs-ı mezbûr mütevakkıf olduğu umûrun küllîsine işbu mezbûre Râziye Hâtun’u tarafımdan vekîl eyledim dedikde, ol dahi vekâlet-i mezbûreyi kabûl ve hizmet-i lâzımesin kemâ-yenbağī edâya ta‘ahhüd etmeğin, işbu vesîka bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelâhire li sene 1102. Şuhûdü’l-hâl: Hasan Çelebi b. Abdülcelîl, Mehmed Efendi b. Mustafa, İbrahim Çelebi b. Ahmed, İbrahim Çelebi b. Mehmed, İbrahim Çelebi b. Mustafa.