Bab Mahkemesi 54 Numaralı Sicil (H. 1102 / M. 1691) cilt: 20, sayfa: 377 Hüküm no: 458 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Abdullah’ın mukâtaa hususunda Zümre köyü ahalisinin zimmetini ibra etmesi Vilâyet-i Anadolu’da Divriği Kazâsı’na tâbi‘ Zümre nâm karye sükkânından Mustafa Ağa b. Abdullah meclis-i şer‘-i şerîf-i enverde, yine karye-i mezbûre re‘âyâsından işbu bâ‘isü’l-vesîka Varton v. Manok ve Aritun v. Avada ve Anos v. Melkon ve Murad v. Yani ve Bedros ve sâirleri muvâcehelerinde ikrâr-ı tâm ve takrîr-i kelâm edip, bin yüz senesinde ben karye-i mezbûre re‘âyâsının ber vech-i maktû‘ kaydiyyesi beş yüz beş guruşu cem‘ ü tahsîle me’mûr olmağla, cem‘ ü tahsîl-i meblağ esnâsında karye-i mezbûre ahâlîsinden bi’d-defa‘ât üç yüz seksen guruşun ben cem‘ ü tahsîli yüz yirmi beş guruş bâkī kalmışdı. El-hâletü hâzihî meblağ-ı bâkī-i mezbûrun bir mikdârını karye-i mezbûrede vekîlim olan Abdurrahman nâm kimesne ve bir mikdârını dahi kābız-ı mâl olan Ustuvar v. Serkis kabz eylediği muvâcehemle şer‘an sâbit olmağla, meblağ-ı mezbûra müte‘allika merkūm karye re‘âyâsıyla da‘vâ ve nizâ‘ımız kalmamışdır dedikde, gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fî evâhiri Cumâdelâhire li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, İbrahim b. Ahmed, İbrahim b. Mehmed, Ali [b.] Bâli.