Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 439 Hüküm no: 451 Orijinal metin no: [109b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makos v. Velikan adlı Ermeni’nin, ölen Sarraf Kasper’e olan borcunu mirascılarının vekiline teslim ettiği Bâ-imzâ-i Hazret-i veliyyü’n-ni‘am. Mahmiye-i İstanbul’da Mercan kurbünde sâkin Makos v. Velikan nâm Ermeni mahmiye-i mezbûrede meclis-i şer‘de mahmiye-i mezbûrede Balat kapısı dâhilinde Ohri mahâllesi’nde sâkin iken bundan akdem hâlik olan Sarrâf Kasper v. Abraham nâm Ermeni’nin hasran vârisleri olan sulbî sagīr oğlu Gabriyel ve sagīre kızları Estoban ve Anna’nın min-kıbeli’l-ümm cedleri ve tesviye-i emrlerine bâ-hüccet-i şer‘iyye kıbel-i şer‘den mansûb vasîleri olan işbu râfi‘ü’s-sifr Maruka v. Kirkor v. Yula nâm Ermeni tarafından husûs-ı âti’l-beyana vekîl olduğu Hokas v. Karabet ve Bedros v. Arakil nâm Ermeniler şehâdetleriyle şer‘an sâbit olan Ohan v. Mardıros nâm Ermeni muvâcehesinde ikrâr ve takrîr-i kelâm edip vekîl-i mezbûr Ohan yedinde olan işbu bir kıt‘a deyn temessükü nâtık olduğu üzere benim hâlik-i mezbûr Sarrâf Gaspar’a hayâtında cihet-i karz-ı şer‘îden dokuz yüz guruş zimmetimde vâcibü’l-edâ ve lâzimü’l-kazâ deynim olup meblağ-ı mezbûru kable’l-ahz mesfûr Gaspar hâlik olup zimmetimde kalmağla meblağ-ı mezbûrun üç yüz seksen guruşunu temessük-i mezbûr zahrında tahrîr olunan vech üzere ben vasiyy-i müvekkil-i mezbûr Maroka’ya def‘ ü teslîm ol dahi bi’l-vesâye yedimden ahz u kabz edip beş yüz yirmi guruş bâkī kalmağla meblağ-ı bâkī-i mezbûr beş yüz yirmi guruş hâlik-i mezbûrun ber-vech-i muharrer vârisleri olan sıgār-ı mezbûrûna el-an zimmetimde vâcibü’l-edâ ve lâzimü’l-kazâ deynimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: el-Hâc Ali, Ahmed Çavuş b. İbrahim, el-Hâc Osman b. ( ), İbrahim Çelebi b. ( ), İbrahim Efendi, Süleyman Ağa b. Şaban. Hokas v. Karabet ve Panos v. Karabet, Bedros v. Arakil, Nikogos v. Haçok, Agob v. Ari, Milnars v. Serkis, Nikogos v. Haçok.