Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 440 Hüküm no: 452 Orijinal metin no: [109b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yeniçeri Yusuf Beşe’ye Kirmasti ahalisinden Mehmed’in akrabalık iddiası Mahmiye-i İstanbul’da Keseğen Dede kurbünde Nişâncı mahâllesinde Dergâh-ı âlî yeniçerilerinden olup bin on beş senesinde tarîk-ı hacda vefât eden Yusuf Beşe b. Abdullah’ın vech-i âtî üzere usûbet-i sebebiye cihetinden vârisi olduğunu iddi‘â edip vilâyet-i Anadolu’da Kirmasti kasabasında Şeyh mahâllesi ahâlîsinden bâ‘isü’l-kitâb Mehmed b. Hasan b. Mehmed nâm kimesne mahmiye-i mezbûrede meclis-i şer‘-i hatîrde mezbûr Yusuf Beşe fevt oldukda zâhirde zevce-i metrûkesi Fâtıma bt. Abdullah nâm hatundan gayri vâris-i ma‘rûfu olmamakla terekesinin rub‘u zevcesine ve selâse-i erbâ‘ı cânib-i beytülmala âid ve râci‘ olmak zu‘muyla müteveffâ-yı mezbûrun selâse-i erbâ‘ı terekesine bi’l-emânet vâzı‘ü’l-yed olan Dergâh-ı âlî yeniçerileri Beytülmâl emîni fahrü’l-akrân Süleyman Ağa b. Abdurrahman mahzarında üzerine da‘vâ ve takrîr-i kelâm edip ben müteveffâ-yı mezbûr Yusuf Beşe’yi abd-i memlûkü olduğu hâlde i‘tâk edip zikr olunan Kirmasti kasabasında Şeyh mahâllesinde sâkin iken bundan akdem vefât eden Bayram Çavuş b. Mehmed b. Muslı’nın li-ebeveyn karındaşı oğlu olup benim babam mezbûr Hasan ile merkūm Bayram Çavuş li-ebeveyn karındaşlar olup babaları ismi mezbûr Mehmed ve dedeleri ismi merkūm Muslı ve vâlideleri ismi Emine bt. Abdullah ve maskat-ı re’sleri kasaba-i mezbûrda sâlifü’z-zikr Şeyh mahâllesi olmağla vech-i meşrûh üzere müteveffâ-yı mezbûr Yusuf Beşe’nin verâseti zevce-i metrûkesi merkūme Fâtıma Hatun ile usûbet-i sebebiye cihetinde bana münhasıra olmağın hâlâ mezbûr Yusuf Beşe’nin [110a] terekesinden bi’l-irsi’ş-şer‘î bana isâbet edip makbûzu olan selâse-i erbâ‘ hissemi emîn-i mûmâ-ileyhden taleb ederim, suâl olunsun dedikde gıbbe’s-suâl emîn-i mûmâ-ileyh cevâbında fi’l-hakīka müteveffâ-yı mezbûrun terekesine ber-vech-i muharrer vaz‘-ı yedini ikrâr lâkin müdde‘î-i mezbûrun vech-i meşrûh üzere verâsetini inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden ve kasaba-i mezbûrede Karaağaç mahâllesi sükkânından es-Seyyid Mehmed b. Abdülkadir ve Şeyh mahâllesi sükkânından Ahmed Beşe [b.] Veli nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu müdde‘î-i mezbûr Mehmed mahmiye-i İstanbul’da Keseğen Dede kurbünde Nişâncı mahâllesinden ve dergâh-ı âlî Yeniçerilerinden olup bin yüz on beş senesinde tarîk-ı hacda vefât eden Yusuf Beşe b. Abdullah’ın abd-i memlûkü olduğu hâlde i‘tâk eden Bayram Çavuş’un li-ebeveyn karındaşı oğludur, müdde‘î-i mezbûrun babası mezbûr Hasan ile merkūm Bayram Çavuş li-ebeveyn karındaşlardır babaları ismi Mehmed ve dedeleri ismi Muslı ve vâlideleri ismi Raziye [Emine] b. Abdullah ve maskat-ı re’sleri kasaba-i mezbûrede sâlifü’z-zikr Şeyh mahâllesidir müteveffâ-yı mezbûrun verâseti zevce-i metrûkesine ve usûbet-i sebebiye cihetinden müdde‘î-i mezbûr Mehmed’e münhasıradır bundan gayri vâris ve terekesine müstahakk-ı âhar olduğu ma‘lûmumuz [değil]dir müdde‘î-i mezbûr için müteveffâ-yı mezbûrun selâse-i erbâ‘ı terekesin vâzı‘ü’l-yed olan emîn-i mûmâ-ileyhden ve sâir vâzı‘ü’l-yed olanlardan hakk-ı taleb ve ahz vardır, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince müdde‘î-i mezbûrun verâsetine ba‘de’l-hükm ve’t-tenbîh mâ-hüve’l-vâkî bi‘t-taleb ketb olundu. Fî-selhi Cemâziyelâhire li-sene sitte aşere ve mi’e ve elf. Şuhûdü’l-hâl: eş-Şeyh Abdurrahman Efendi b. Abdullah, İsmail Efendi sandalcızâde, Mehmed Efendi b. Ahmed, el-Hâc Yusuf b. Osman, Mehmed Beşe b. Abdullah, Yusuf b. İbrahim.