Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 441 Hüküm no: 453 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hüseyin’in, vefat eden Pirinççioğlu Mustafa Ağa’da olan alacağını oğlu Numan Çelebi’den talep etmesi Mahmiye-i İstanbul’da Arabacı Bâyezid mahâllesinde sâkin işbu râfi‘ü’l-vesîka el-Hâc Mustafa b. el-Hâc Hüseyin nâm kimesne mahmiye-i mezbûrede meclis-i şer‘-i hatîrde bundan akdem vefât eden Pirinçcioğlu demekle ma‘rûf Mustafa Ağa b. Mehmed b. Abdurrahman nâm müteveffânın sulbî kebîr oğlu Numan Çelebi nâm kimesne mahzarında üzerine da‘vâ ve takrîr-i kelâm edip mezbûr Numan Çelebi’nin babası müteveffâ-yı mezbûr Pirinçcioğlu Mustafa Ağa’ya hayâtında beş yüz guruş ikrâz ve teslîm ol dahi iktirâz ve kabz ve istihlâk etmişidi, oğlu mezbûr Numan Çelebi meblağ-ı mezbûr beş yüz guruşa emr u kabûlü hâviye kefâlet-i sahîha ile kefil olduğundan sonra mezbûr Mustafa Ağa kable’l-edâ vefât etmekle meblağ-ı mezbûr yüz seksen guruşu mezbûr Numan Çelebi’nin beynimizde ma‘lûm zimemâtı bedelinden kabz u istîfâ edip üç yüz yirmi guruş bâkī kaldığından mâ‘adâ mezbûr Numan Çelebi zimmetinde zimemât-ı karz-ı şer‘îden elli guruş dahi hakkım olmağın hâlâ cihet-i kefâletden olan meblağ-ı bâkī üç yüz yirmi guruş ile karz-ı şer‘îden olan elli guruşun cem‘an üç yüz yetmiş guruşu mezbûr Numan Çelebi’den bi-hükmi’l-kefâle ve’l-asâle taleb eylediğimde edâda te‘allül eder, suâl olunup alıverilmesi matlûbumdur, dedikde gıbbe’s-suâl mezbûr Numan Çelebi cevâbında babam müteveffâ-yı mezbûrun müdde‘î-i mezbûra cihet-i mezbûreden beş yüz guruş deyni olduğunu ve kendinin müdde‘î-i mezbûra meblağ-ı mezbûr elli guruş deyni olduğunu ikrâr lâkin meblağ-ı mezbûr beş yüz guruşa kefil olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i mezbûrede Emin Bey mahâllesi sükkânından Hasan Efendi b. Ali ve Bâlî Paşa mahâllesinden Ahmed Çelebi b. İbrahim ve Seyyid Ömer mahâllesinden Hâc Mehmed b. Abdullah ve İbrahim Çelebi b. Mustafa nâm kimesneler li-ecli’ş-şehâde meclis-i şer‘e hâzirûn olup istişhâd olundukların fi’l-hakīka mezbûr el-Hâc Mustafa’nın müteveffâ-yı mezbûr Pirinçcioğlu Mustafa Ağa b. Mehmed b. Abdurrahman zimmetinde olan meblağ-ı mezbûr beş yüz guruşa müteveffâ-yı mezbûrun hayâtında oğlu işbu mezbûr Numan Çelebi emr u kabûlü hâviye kefâlet-i sahîha-i şer‘iyye ile bizim huzûrumuzda kefil ve zâmin oldu bizler bu husûsa bu vech üzere şâhidleriz, şehâdet dahi ederiz deyü edâ-yı şehâdet-i şer‘iyye etdiklerinde şuhûd-ı mezbûrûndan zeyl-i vesîkada mastûrü’l-esâmi olan Müslimînden sırren ve alenen ta‘dîl ve tezkiye olunup [110b] her biri adl ve makbûlü’ş-şehâde olduğu müte‘ayyen ve şehâdetleri makbûle olmağın mûcibince ba‘de’l-hükm mu‘terif olduğu meblağ-ı mezbûr elli guruş ile cihet-i kefâletden olan meblağ-ı bâkī-i mezbûr üç yüz yirmi guruş ki cem‘an üç yüz yetmiş guruşu müdde‘î-i mezbûra edâ ve teslîme mezbûr Numan Çelebi’ye tehbîh-birle mâ-vaka‘a bi’t-taleb ketb olundu. Fî-selhi Cemâziyelâhire li-sene sitte aşere ve mi’e ve elf. Şuhûdü’l-hâl: Mustafa Efendi imam-ı Sultân Bâyezid, Mehmed b. Mustafa, el-Hâc Mehmed b. İsmail, Mustafa Beşe b. Mehmed, İbrahim b. el-Hâc Halil, Kafesdâr Mehmed Ağa b. ( ), el-Hâc Hüseyin b. Ali, Şaban b. ( ), Mehmed Çelebi b. Sefer, el-Hâc Abdurrahman, el-Hâc Ebubekir, Mustafa b. Hasan, Osman Beşe b. ( ), Hüseyin b. Mehmed.