Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 442 Hüküm no: 454 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin Hasan Ağa’dan köle olarak satın aldığı Yusuf’un aslen hür olduğunun anlaşılması Medîne-i Bursa’da Nalbandoğlu mahâllesi ahâlîsinden olup mahmiye-i İstanbul’da Alipaşa-i atik mahâllesinde müsâfiren sâkin işbu bâ‘isü’l-vesîka Mehmed Efendi b. Ahmed mahmiye-i mezbûrede meclis-i şer‘-i hatîrde Hasan Ağa b. Abdurrahman nâm kimesne mahzarında üzerine da‘vâ ve takrîr-i kelâm edip târîh-i kitâbdan üç sene mukaddem işbu uzun boylu açık kaşlı elâ gözlü Yusuf [b.] Mustafa’yı yetmiş beş guruş semen-i medfû‘a hâzır bi’l-meclis Ali Ağa b. Mustafa vesâtetiyle abd-i memlûkü olmak üzere bana bey‘ ve temlîk ve teslîm ben dahi iştirâ ve tesellüm ve kabûl eylediğimden sonra mezbûr Yusuf Mustafa vilâyet-i Anadolu’da İskilib kazâsına tâbi‘ Örübağı nâm karye sükkânından hürrü’l-asl olan Bünyad nâm kimesnenin firâşından hasıl ve hürretü’l-asl olan zevcesi Meryem nâm hatundan mütevellid hürrü’l-asl olduğunu işbu târîh-i kitâb senesi Cemâziyelevveli’nin yirminci gününde medîne-i mezbûrda bâb nâibi olan el-Hâc Ali Efendi huzûrunda benden da‘vâ ve müdde‘âsını muvâcehemde udûl-i Müslimînden el-Hâc Musa b. ( ) ve Mehmed Beşe b. Osman şehâdetleriyle vech-i şer‘i üzere ba‘de’l-isbât hürriyetine hükm olunmağla hâlâ mevsûf-ı mezbûrun semeni deyü medfû‘um olan meblağ-ı mezbûr yetmiş beş guruşu mezbûr Hasan Ağa’dan bi’l-mürâca‘a taleb ederim suâl olunsun deyip min-külli’l-vücûh takrîr-i meşrûhunu nâtıka ve nâib-i mezbûrun imzâ ve hatemini hâviye ve târîh-i mezbûr ile müverreha bir kıt‘a hüccet-i şer‘iyye ibrâz edicek gıbbe’s-suâl mezbûr Hasan Ağa cevâbında fi’l-hakīka târîh-i mezbûrda mevsûf-ı mezbûru abd-i memlûkü olmak üzere müdde‘î-i mezbûra yetmiş beş guruş semen-i makbûza bey‘ ve teslîm eylediğini ikrâr lâkin mazmûn-ı hücceti inkâr etmeğin müdde‘î-i mezbûrdan mazmûn-ı hüccet-i mezkûreye beyyine taleb olundukda udûl-i ahrâr-ı ricâl-i Müslimînden medîne-i mezbûrda Çekirge mahâllesinden olup mahmiye-i mezbûrede zikr olunan Alipaşa-i atik mahâllesinde müsâfiren sâkin İbrahim Bey b. İsmail ve Hasan Çelebi b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ işbu mevsûf-ı mezbûr Yusuf Mustafa işbu târîh-i kitâb senesi Cemâziyelevveli’nin yirminci gününde medîne-i mezbûrda bâb nâibi olan el-Hâc Ali Efendi huzûrunda vilâyet-i Anadolu’da İskilib kazâsına tâbi‘ Örübağı nâm karye sükkânından Bünyad nâm kimesnenin firâşından hâsıl ve zevcesi Meryem nâm hatundan mütevellid sulbî oğlu ve hürrü’l-asl olduğunu müdde‘î-i mezbûr Mehmed Efendi’den da‘vâ ve müdde‘âsını muvâcehesinde el-Hâc Musa b. Eyyim ve Mehmed Beşe b. Osman şehâdetleriyle bizim huzûrumuzda isbât edip nâib-i mûmâ-ileyh dahi mevsûf-ı mezbûrun hürriyetine ba‘de’l-hükm işbu hüccet-i şer‘iyyeyi yedine def‘ ü i‘tâ eyledi biz mazmûn-ı hüccet-i mezkûreye şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince meblağ-ı mezbûr yetmiş beş guruşu müdde‘î-i merkūm Mehmed Efendi’ye edâ ve teslîme mezbûr Hasan Ağa’ya tenbîh-birle mâ-hüve’l-vâki‘ bi‘t-taleb ketb olundu. Fî-gurreti Recebi’l-mürecceb li-sene sitte aşere ve mi’ete ve elf. Şuhûdü’l-hâl: Hüseyin Efendi b. Ahmed, el-Hâc Hüseyin b. Ali, el-Hâc Süleyman b. Hasan, Halil Bey b. Ali, Veliyüddin Efendi el-kādı, el-Hâc Mustafa Efendi b. Hasan Efendi.