Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 444 Hüküm no: 455 Orijinal metin no: [111a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin diğer Hasan Efendi’den satın aldığı cariye için verilen borç temessükü davası Mahmiye-i İstanbul’da Şeyh Vefa mahâllesinde sâkin Hasan Efendi b. Ali nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde Alipaşa-i atik mahâllesi sükkânından bâ‘isü’l-kitâb diğer Hasan Efendi b. Hüseyin tarafından husûs-ı âti’l-beyana vekîl olduğu Mustafa b. Abdullah ve Mehmed b. Ali nâm kimesneler şehâdetleriyle şer‘an sâbit olan sulbî kebîr oğlu Hüseyin Çelebi mahzarında ikrâr ve takrîr-i kelâm edip müvekkil-i mezbûr Hasan Efendi zimmetinde bundan akdem cins ve evsâfı beynimizde ma‘lûm yedimden iştirâ ve kabz eylediği câriye semeninden iki yüz guruş hakkım olup yedime deyn temessükü dahi vermiş idi, el-hâletü hâzihi müvekkil-i mezbûr diğer Hasan Efendi meblağ-ı mezbûr iki yüz guruşu tamâmen bana edâ ve teslîm ben dahi yedinden ahz u kabz edip husûs-ı mezbûra ve gayra müte‘allıka âmme-i da‘vâdan müvekkil-i mezbûrun zimmetini ibrâ ve iskāt eyledim lâkin müvekkil-i mezbûrun mukaddemâ bana verdiği deyn temessükü zâyi‘ olmağla fîmâ-ba‘d zikr olunan temessükü bende veyâ vekîlimizde bir tarîkle zuhûr ederse lede’l-hükkâmi’l-kirâm makbûle ve mesmû‘a olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cemâziyelâhire li-sene sitte aşere ve mi’e ve elf. Şuhûdü’l-hâl: Osman Efendi b. Abdullah, Çavuşbaşı kethüdâsı İbrahim Ağa, Mübâşir İbrahim Çavuş b. Abdullah, Emir Mehmed Efendi el-kādı, İsmail Efendi Sandalcızâde, el-Hâc Mehmed Efendi el-kādı.