Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 444 Hüküm no: 456 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihaliç ahalisinden İsmail Beşe’nin haksız yere aldığı cerime davasında sulh olduğu Vilâyet-i Anadolu’da Mihaliç kazâsına tâbi‘ Kadıköyü nâm karye ahâlîsinden İsmail Beşe b. İsmail nâm kimesne mahmiye-i İstanbul’da meclis-i şer‘-i hatîr-i lâzımü’t-tevkīrde işbu bâ‘isü’l-vesîka el-Hâc Arslan b. Abdullah nâm kimesne mahzarına ikrâr ve takrîr-i kelâm edip bundan akdem mezbûr el-Hâc Arslan kasaba-i mezbûrda Yeniçeri Serdârı iken cerîme nâmıyla bi-gayrı hakkın on beş guruşumu ahz u kabz ve istihlâk etmekle meblağ-ı mezbûru merkūm el-Hâc Arslan’dan taleb ve da‘vâ eylediğimde ol dahi inkâr etmeğin beynimizde nizâ‘-ı kesîr vâki‘ olmuş idi, el-hâletü hâzihi muslihûn tavassut edip da‘vâ-i mezkûrumdan beni merkūm el-Hâc Arslan ile dokuz guruş üzerine musâlaha eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr dokuz guruşu merkūm el-Hâc Arslan yedinden tamâmen ahz u kabz edip mâ‘adâsına ve husûs-ı mezbûra müte‘allıka da‘vâdan merkūm el-Hâc Arslan’ın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ hüve’l-vâkî bi‘t-taleb ketb olundu. Fî-selhi Cemâziyelâhire li-sene sitte aşere ve mi’e ve elf. Şuhûdü’l-hâl: Cafer Beşe b. İbrahim, Hasan Beşe b. Mehmed, Osman Beşe b. Mustafa, Mustafa beşe b. Hasan mumcu, el-Hâc Yusuf b. Osman, Mehmed Çelebi b. Ali, Mustafa Çelebi b. Ali, Ali Beşe b. Ahmed.