Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 445 Hüküm no: 457 Orijinal metin no: [111a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kılıçcı Ali Çelebi’nin sâbık Ohri Valisi Ali Paşa’ya vermiş olduğu borcu, kefil Osman Ağa’dan talep etmesi Bâ-imzâ-i Hazret-i veliyyü’n-ni‘am. Mahmiye-i İstanbul’da Sultân Ahmed Han -aleyhi’r-rahmetü ve’l-gufrân- Câmi‘-i şerîfi kurbünde sâkin işbu râfi‘ü’l-kitâb Kılıçcı Ali Çelebi b. Mustafa nâm kimesne mahmiye-i mezbûrede meclis-i şer‘de Osman Ağa b. Yusuf nâm kimesne mahzarında üzerine da‘vâ ve takrîr-i kelâm edip yedimde olan mümzâ ve mahtûm iki kıt‘a deyn temessükü nâtık olduğu üzere sâbıkā Ohri Vâlisi olan işbu hâzır-bi’l-meclis sa‘âdetlü Ali Paşa b. Abdi zimmetinde cihet-i karz-ı şer‘îden üç bin guruş hakkım olup meblağ-ı mezbûra merkūm Osman Ağa ile gāib ani’l-meclis İslâm Bey nâm kimesneden her biri müstakillen kefâlet-i sahîha-i şer‘iyye ile kefil oldukdan sonra meblağ-ı mezbûrun beş yüz guruşunu kefil-i mezbûr Osman Ağa’dan ve beş yüz guruşunu dahi kefil-i gāib-i mezbûr İslâm Bey’den ki bu vech üzere meblağ-ı mezkûrun cem‘an bin guruşunu ahz u istî‘fâ edip iki bin guruşu bâkī kalmağla hâlâ meblağ-ı bâkī-i mezbûru kefâletine binâen merkūm Osman Ağa’dan taleb ederim suâl olunsun dedikde gıbbe’s-suâl [111b] merkūm Osman Ağa cevâbında fi’l-hakīka kazıyye vech-i muharrer üzere olup müdde‘î-i mezbûra sen cihetü’l-kefâleti’l-mezkûre kabzını mu‘terif olduğu meblağ-ı mecmû‘-ı mezkûr bin guruşdan mâ‘adâsı olan meblağ-ı bâkī-i mezbûr iki bin guruş el-an zimmetimde vâcibü’l-edâ ve lâzimü’l-kazâ deynimdir deyü tav‘an ikrâr ve i‘tirâf etmeğin alâ-mûceb-i i‘tirâfihî meblağ-ı bâkī-i mezbûr iki bin guruşu bi-hükmi’l- kefâleti’l-mezkûre müdde‘î-i mezbûra edâ ve teslîme merkūm Osman Ağa’ya ba‘de’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Ahmed Bey b. ( ), Mehmed Çavuş b. Yakub, Süleyman Ağa b. Şaban, Hüseyin Efendi, Hasan Ağa tâbi‘-i Sadr-ı âlî, Ömer b. Mehmed, Ahmed Bey b. Abdullah Bosnavî, Uzun Mustafa b. Hasan.