Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 445 Hüküm no: 458 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ferhad’ın, ölen Sarraf Gaspar’dan almış olduğu borç parayı inkâr etmesi Mahmiye-i İstanbul’da Balatkapısı dâhilinde Ohri mahâllesinde sâkin iken bundan akdem hâlik olan Sarrâf Gaspar v. Abraham nâm Ermeni’nin verâseti sulbî sagīr oğlu Gabriyel ve sulbiye sagīre kızları Estoban ve Anna’ya münhasıra olduğu lede’ş-şer‘ zâhir ve müte‘ayyin oldukdan sonra sıgār-ı mezbûrûnun min-kıbeli’l-ümm cedleri ve tesviye-i emrlerine hüccet-i şer‘iyye ile kıbel-i şer‘den mansûb vasîleri olan Maruka v. Kirkor v. Yula nâm Ermeni tarafından husûs-ı âti’l-beyana vekîl olduğu el-Hâc Ali b Mehmed ve el-Hâc Osman b. Hasan nâm kimesneler şehâdetleriyle şer‘ân sâbit olan işbu râfi‘ü’s-sifr Ohan v. Mardıros nâm Ermeni mahmiye-i mezbûrede meclis-i şer‘de el-Hâc Ahmed b. el-Hâc Ferhad nâm kimesne mahzarında üzerine da‘vâ ve takrîr-i kelâm edip hâlik-i mezbûrun hayâtında mezbûr el-Hâc Ahmed zimmetinde ber-mûceb-i temessük cihet-i karz-ı şer‘îden bin beş yüz guruş hakkı olup meblağ-ı mezbûru kable’l-ahz merkūm Sarrâf Kasper hâlik olup meblağ-ı mezbûr ırsen sıgār-ı mezbûrûna isâbet ve intikāl eyledikden sonra meblağ-ı mezbûrun dokuz yüz altmış yedi guruş ve üç rub‘ guruşu bundan akdem müvekkilim vasiyy-i mezbûr Maruk’a bi’l-vesâye mezbûr el-Hâc Ahmed yedinden ahz u kabz edip beş yüz otuz iki guruş ve bir rub‘ guruş bâkī kalmağla hâlâ meblağ-ı bâkī-i mezbûru bi’l-vekâle mezbûr el-Hâc Ahmed’den taleb ederim suâl olunsun dedikde gıbbe’s-suâl mezbûr el-Hâc Ahmed cevâbında hâlik-i mezbûr Sarrâf Kasper’e cihet-i mezbûrdan bin beş yüz guruş deynim vardır deyü ikrâr ve i‘tirâf edip hâlik-i mezbûr yedine meblağ-ı mezbûru nâtık işbu bir kıt‘a deyn temessükü dahi vermiş idim lâkin ben hâlik-i mezbûrdan ancak dokuz yüz guruşu iktirâz ve kabz ve istihlâk edip mâ‘adâsı olan altı yüz guruşu iktirâz ve kabz etmeyip devr-i şer‘î ve iltizâm-ı ribh olmamış mahz-ı ribâdır deyü def‘le mukābele ve ziyâde medfû‘um olan altmış yedi guruş ve üç rub‘ guruşu istirdâd ederim deyücek isre’l-istintâk ve’l-inkâr mezbûr el-Hâc Ahmed’den takrîr-i meşrûhuna mutâbıka beyyine taleb olundukda ityân-ı beyyine için istimhâl etmekle ki[râ]ren ve mirâren imhâl olunup ityân-ı beyyineden izhâr-ı aczi lede’ş-şer‘ sâbit ve mütehakkık olup şer‘an lâzım gelen tahlîfi sıgār-ı mezbûrûnun rüşd ve bülûğlarına değin ba‘de’t-tevkīf meblağ-ı bâkī-i mezbûr beş yüz otuz iki guruş ve bir rub‘ guruşu vekîl-i mezbûra teslîme mezbûr el-Hâc Ahmed’e ba‘de’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: el-Hâc Ali b. Mehmed, el-Hâc Osman b. Hasan, Mahmud Bey, Ali Bey b. Bayram ve gayruhum.