Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 446 Hüküm no: 459 Orijinal metin no: [111b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyos v. Konilo’nun atı tarafından ezilerek ölen kadının çocuklarının diyet talebi Havâss-ı aliyye kazâsına tâbi‘ kasaba-i Hasköy mahâllâtından Yenimahalle’de sâkine olup bundan akdem hâlike olan Bekfeti? bt. Dimitri nâm Nasrâniyenin verâseti sulbî kebîr oğulları Kiryazi ve İstidol ve Davrid ve Aley evlâd-ı Aros nâm zimmîler mahmiye-i İstanbul’da meclis-i şer‘-i hatîr-i lâzimü’t-tevkīrde işbu bâ‘isü’s-sifr İlyos v. Konilo nâm zimmî muvâcehesinde her biri ikrâr ve takrîr-i kelâm edip anamız hâlike-i merkūmeyi [târîh-i] kitâbdan yirmi yedi gün mukaddem Edirne’den gelir iken Kumburgas nâm mahâlde merkūm İlyos ata râkib olduğu hâlde bindiği at çiynemesinden nâşî hâlike olmağla mûcib-i şer‘îsi bundan akdem [112a] merkūm İliyos’dan taleb ve da‘vâ eylediğimizde ol dahi husûs-ı mezbûru bi’l-külliye münkir olup bu vech ile beynimizde nizâ‘-ı kesîr vâki‘ olmuş idi, el-hâletü hâzihi muslihûn tavassut edip da‘vâ-i mezkûremizden bizi merkūm İlyos ile yirmi dokuz guruş üzerine musâlaha eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûru merkūm İlyos yedinden ahz u kabz edip anamız hâlike-i merkūmenin dem ü diyetine müte‘allıka da‘vâdan biz merkūm İlyos’un zimmetini ibrâ ve iskāt eyledik ol dahi bedel-i sulh olmak üzere bize medfû‘u olan yirmi dokuz guruşa müte‘allıka da‘vâdan bizim her birimizin zimmetini ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Cemâziyelâhire li-sene sitte aşere ve mi’e ve elf. Şuhûdü’l-hâl: Mustafa Çelebi b. Mehmed, el-Hâc Halil b. Abdullah, Mehmed b. Hasan, el-Hâc Yusuf el-muhzır, Marad v. Safer, Yemandi v. Dimitri, Nikola v. Yorgaki, Pastol v. Yanaki.