Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 447 Hüküm no: 460 Orijinal metin no: [112a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa’nın, Mehmed Ağa ve Yasef adlı Yahudiye borç olarak para ve mücevher hançer verdiğinin tesbiti Bâ-imzâ-i Hazret-i veliyyü’n-ni‘am. Mahmiye-i İstanbul’da Firuzağa mahâllesinde sâkin işbu râfi‘ü’l-kitâb es-Seyyid Mahmud Ağa b. Ahmed nâm kimesne mahmiye-i mezbûrede meclis-i şer‘de Mehmed Ağa b. Abdullah nâm kimesne mahzarında üzerine da‘vâ ve takrîr-i kelâm edip bundan akdem işbu yedimde olan mümzâ ve mahtûm bir kıt‘a deyn temessükünü nâtık olduğu üzere ben malımdan mezbûr Mehmed Ağa ile hâzır bi’l-meclis Yasef v. Mosi nâm Yahûdîye nakid iki bin beş yüz guruş ikrâz ve teslîm mezbûr dahi iktirâz ve kabz ve istihlâk eylediklerinden mâ‘adâ yedimde mülküm olup beynimizde ma‘lûm olan bir mücevher hançeri iki bin beş yüz guruşa merkūmân Mehmed Ağa ve Yasef Yahûdîye bâtten bey‘ ve teslîm, mezbûrân dahi ber-vech-i muharrer ba‘de’l-iştirâ ve’l-kabz nakid olan iki bin beş yüz guruş ile mârrü’z-zikr hançer semeni olan iki bin beş yüz guruş ki cem‘an beş bin guruşdan her biri âharın zimmetine lâzım gelen meblağa tarafeynden emr u kabûlü hâvîye kefâlet-i sahîha-i şer‘iyye ile kefil olmağla hâlâ meblağ-ı mecmû‘-ı mezkûr beş bin guruşu asâleten ve kefâleten mezbûr Mehmed Ağa’dan taleb ve da‘vâ ederim suâl olunsun, dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden ve mahmiye-i mezbûrede Lâleliçeşme kurbünde sâkin Hazînedârbaşı Mustafa Ağa b. Hüseyin ve Hocapaşa mahâllesinde sâkin Ahmed Efendi b. Mustafa ve Mustafa Ağa b. İsa ve Mahmudpaşa mahâllesinde sâkin ve sâbıkā bazergânbaşı olan İsmail Ağa b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ işbu müdde‘î-i mezbûr es-Seyyid Mahmud Ağa yedinde malı olan nakid iki bin beş yüz guruşu işbu merkūm Mehmed Ağa ile hâzır bi’l-meclis mezbûr Yasef Yahûdîye bundan akdem bizim huzûrumuzda ikrâz ve teslîm mezbûr dahi iktirâz ve kabz ü istihlâk eylediklerinden mâ‘adâ müdde‘î-i mezbûr es-Seyyid Mahmud Ağa yedinde mülkü olup beynlerinde ma‘lûm olan mücevher hançerini yine bizim huzûrumuzda mezbûrân Mehmed Ağa ve Yasef’e iki bin beş yüz guruşa bâtten bey‘ ü teslîm mezbûrân dahi ba‘de’l-iştirâ ve’l-kabz nakid olan iki bin beş yüz guruş ile mârrü’z-zikr hançer semeni olan iki bin beş yüz guruş ki cem‘an beş bin guruşdan mezbûrân Mehmed Ağa ve Yasef’den her biri âharın zimmetine lâzım gelen meblağa yine bizim huzûrumuzda kefâlet-i sahîha-i şer‘iyye ile kefil oldu biz bu husûsa bu vech üzere şâhidleriz, şehâdet dahi ederiz, deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sânî min-Recebi’l-ferd li-sene sitte aşere ve mi’e ve elf. Şuhûdü’l-hâl: Süleyman Ağa b. Ebubekir, İbrahim Efendi b. Ataullah, Ali Çelebi b. Abdullah, Mehmed Çelebi b. ( ).