Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 448 Hüküm no: 461 Orijinal metin no: [112a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa’nın Mehmed Ağa’ya vermiş olduğu borcunu tahsili Bâ-imzâ-i Hazret-i veliyyü’n-ni‘am. Mahmiye-i İstanbul’da Firuzağa mahâllesinde sâkin işbu râfi‘ü’l-kitâb es-Seyyid Mahmud Ağa b. Ahmed nâm kimesne mahmiye-i mezbûrede meclis-i şer‘de Mehmed Ağa b. Abdullah nâm kimesne mahzarında üzerine da‘vâ ve takrîr-i kelâm edip işbu yedimde olan mümzâ ve mahtûm bir kıt‘a deyn temessükü nâtık olduğu üzere merkūm Mehmed Ağa zimmetinde cihet-i karz-ı şer‘îden bin beş yüz guruş hakkım olmağla hâlâ meblağ-ı mezbûru merkūm Mehmed Ağa’dan taleb ederim suâl olunsun dedikde gıbbe’s-suâl mezbûr Mehmed Ağa cevâbında fi’l-hakīka kazıyye vech-i muharrer üzere olup müdde‘î-i mezbûr yedine verdiğim mümzâ ve mahtûm işbu bir kıt‘a deyn temessükü nâtık olduğu üzere cihet-i mezkûrdan [112b] meblağ-ı mezbûr bin beş yüz guruş el-an zimmetimde vâcibü’l-edâ ve lâzımü’l-kazâ deynimdir deyü tav‘an ikrâr ve i‘tirâf etmeğin alâ-mûcib-i i‘tirâfihî meblağ-ı mezbûr bin beş yüz guruşu müdde‘î-i mezbûra edâ ve teslîme merkūm Mehmed Ağa’ya ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sânî min-Recebi’l-ferd li-sene sitte aşere ve mi’e ve elf. Şuhûdü’l-hâl: Süleyman Ağa b. Ebubekir, İbrahim Efendi b. Ataullah, Ali b. Abdullah, Mehmed Çelebi b. ( ) ve gayruhum.