Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 449 Hüküm no: 462 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Hıristo’nun Ebubekir Ağa tarafından haksız yere koyun ve bir miktar parasının gasb edildiğine dair iddiasını ispatlayamadığı Vilâyet-i Rumeli’nde Malkara kazâsı ahâlîsinden olup mahmiye-i İstanbul’da müsâfiren sâkin Yorgi v. Hıristo nâm zimmî mahmiye-i mezbûrede meclis-i şer‘de medîne-i Gelibolu ahâlîsinden olup mahmiye-i mezbûrede Vâlide Hanı’nda müsâfiren sâkin işbu bâ‘isü’l-vesîka Ebubekir Ağa b. Ömer nâm kimesne mahzarında üzerine da‘vâ ve takrîr-i kelâm edip mezbûr Ebubekir Ağa bundan akdem medîne-i mezbûrda voyvoda iken bir husûs için beni ahz ve habsedip cerîme namıyla beher bir re’si yüz ellişer akçe kıymetli elli bir re‘s koyunum ile nakid yirmi beş guruşumu bi-gayrı hakkın ahz u kabz etmekle hâlâ mezbûr Ebubekir Ağa’ya suâl olunup zikr olunan koyunlarım mevcûd ise a‘yânını müstehlek ise ba‘de’s-sübût kıymet-i şer‘iyyeleri ile meblağ-ı mezbûr yirmi beş guruşu alıverilmesi matlûbumdur dedikde gıbbe’s-suâl ve akībe’l-inkâr müddeî-i mesfûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘î-i mesfûr Yorgi’nin medîne-i mezbûrda voyvoda iken cerîme nâmıyla beher biri yüz ellişer akçe kıymetli elli bir re‘s koyunu ile nakid yirmi beş guruşunu bi-gayrı hakkın ahz u kabz etmediğine mezbûr Ebubekir Ağa’ya yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcibiyle müdde‘î-i mesfûr Yorgi bilâ-beyyine mezbûr Ebubekir Ağa’yı bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Recebi’l-ferd li-sene sitte aşere ve mi’e ve elf. Şuhûdü’l-hâl: Mehmed Efendi Kādızâde, İsmail Efendi Sandalcızâde, Davud Efendi b. Yahya, Mustafa Efendi b. Hasan, Emin Efendi kâtib, el-Hâc Yusuf b. Osman.