Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 449 Hüküm no: 463 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadızade Mustafa Ağa’nın Ahmed Ağa’da olan borcunu ödemesi Mahmiye-i İstanbul’da Kabasakal Sinanağa mahâllesinde sâkin işbu râfi‘ü’l-kitâb Ahmed Ağa b. Mehmed nâm kimesne mahmiye-i mezbûrede meclis-i şer‘de Kadızâde demekle ma‘rûf Mustafa Ağa b. Süleyman nâm kimesne mahzarında üzerine da‘vâ ve takrîr-i kelâm edip yedimde olan işbu mümzâ ve mahtûm bir kıt‘a deyn temessükü nâtık olduğu üze mezbûr Mustafa Ağa zimmetinde cihet-i karz-ı şer‘îden bin beş yüz guruş hakkım olmağla hâlâ talep ederim suâl olunsun dedikde gıbbe’s-suâl mezbûr Mustafa Ağa cevâbında fi’l-hakīka kazıyye vech-i muharrer üzere olup müdde‘î-i mezbûra yedine verdiğim mümzâ ve mahtûm bir kıt‘a deyn temessükü nâtık olduğu üzere cihet-i mezkûrdan meblağ-ı mezbûr bin beş yüz guruş el-an zimmetimde vâcibü’l-edâ ve lâzimü’l-kazâ deynimdir deyü tav‘an ikrâr ve i‘tirâf etmeğin alâ-mûceb-i i‘tirâfihî meblağ-ı mezbûr bin beş yüz guruşu müdde‘î-i mezbûra edâ ve teslîme mezbûr Mustafa Ağa’ya ba‘de’t-tenbîh mâ-hüve’l-vâki‘ bi‘t-taleb ketb ve terkīm olundu. Fi’l-yevmi’s-sâlis min-Recebi’l-ferd li-sene sitte aşere ve mi’e ve elf. Şuhûdü’l-hâl: Yusuf Bey b. Mehmed, diğer Yusuf Bey b. Musa, Süleyman Bey b. Ahmed, İvaz b. Abdullah.