Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 450 Hüküm no: 464 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin üvey annesi Rahime’ye verdiği emanetler hususunda sulh oldukları Mahmiye-i İstanbul’da Hoca Kasım Gönânî mahâllesi sâkinlerinden Mehmed Çelebi b. Muharrem nâm kimesne mahmiye-i mezbûrede meclis-i şer‘de sâbıkā üveyi vâlidesi işbu râfi‘atü’l-vesîka Rahime bt. Abdullah nâm hatun mahzarında ikrâr ve takrîr-i kelâm edip bundan akdem mezbûre Rahime benim üveyi anam olmağla malımdan nakid yüz yirmi guruş ve eşyâmdan dahi yirmişer guruş kıymetli beş kemer raht ve on altışar guruş kıymetli iki sîm gaddâre ve on guruş kıymetli dört sîm hançer ve yirmişer guruş kıymetli iki sîm kılıç ve on guruş kıymetli iki sîm topuz ve yine on guruş kıymetli iki sîm reşme ve otuz beşer guruş kıymetli iki som sırmalı dikdik ki meblağ-ı mezbûr ile mecmû‘û üç yüz yirmi iki guruşluk eşyâmı mezbûre Rahime yedine emânet vaz‘ ü teslîm ol dahi yedimden ba‘de’l-ahz ve’l-kabz meblağ-ı mezbûr ile eşyâ-i mezkûre mevcûd ise a‘yânını müstehlek ise ba‘des-sübût kıymet-i şer‘iyyelerini mezbûre Rahime’den taleb ve da‘vâ eylediğimde ol dahi cevâbında fi’l-hakīka meblağ-ı mezbûr ile eşyâ-i mezkûreyi sen bana alâ-tarîkı’l-emânet vaz‘ ü teslîm edip ba‘dehû meblağ-ı mezbûr ile eşyâ-i mezkûreyi geri yedimden ahz u kabz etmişidin meblağ-ı mezbûr ile eşyâ-i mezkûreden yedimde ve zimmetimde bir şey kalmamışdır deyip ben dahi inkâr etmekle bu vech üzere beynimizde münâza‘ât-ı kesîre cereyân etmişidi el-hâletü hâzihi meblağ-ı mezbûr ile eşyâ-i mezkûra müte‘allıka âmme-i da‘vâdan mezbûre Rahime’nin zimmetini ibrâ ve iskāt eyledim min-ba‘d husûs-ı mezkûra müte‘allıka aslâ da‘vâ ve nizâ‘ım yokdur, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Recebi’l-ferd li-sene sitte aşere ve mi’e ve elf. Şuhûdü’l-hâl: Mustafa Ağa b. Ali, Ahmed Çelebi b. Mustafa, Mustafa Efendi b. Ali, Mehmed b. Mustafa, Mahmud b. Mustafa, Abdullah Efendi b. Mustafa, Ali b. Şaban, Ebubekir b. Ahmed, Ahmed b. Abdullah, Mehmed Efendi b. Mustafa.