Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 450 Hüküm no: 465 Orijinal metin no: [113a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî kapıcıbaşılarından Ömer Ağa’ya ile Mustafa Ağa’nın birbirlerinin zimmetlerini ibra etmeleri Dergâh-ı âlî kapıcıbaşılarından fahrü’l-eşbâh fazile[tlü] Bölükbaşızâde Ömer Ağa tarafından husûs-ı âti’l-beyana vekîl olduğu İsmail Bey b. Ahmed ve diğer İsmail b. Mustafa nâm kimesneler şehâdetleriyle şer‘an sâbit olan Hasan Ağa b. Süleyman nâm kimesne mahmiye-i İstanbul’da meclis-i şer‘-i hatîr-i lâzimü’t-tevkīrde bâ‘isü’l-kitâb el-Hâc Mustafa Ağa b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Kapıcıbaşı Ömer Ağa’ya mezbûr el-Hâc Mustafa Ağa bundan akdem malından üç bin beş yüz guruşunu ikrâz ve teslîm ve mezbûr Ömer Ağa iktirâz ve kabz ve tesellüm eylediğinden sonra malından iki elmas yüzük ve üç yüz altmış dirhem sîmden maktû‘ bir sâde raht ve bir yeşil sof ferâcesini mezbûr el-Hâc Mustafa Ağa’ya hibe ve teslîm ol dahi ittihâb ve kabz ve tesellüm etmiş idi, hâlâ müvekkilim mûmâ-ileyh Ömer Ağa deyn-i mezkûru olan üç bin beş yüz guruşu mezbûr el-Hâc Mustafa Ağa’ya edâ ve teslîm ol dahi bundan ahz u kabz edip husûs-ı mezbûra müte‘allıka âmme-i da‘vâ dan müvekkilim mûmâ-ileyh Ömer Ağa’nın zimmetini ibrâ ve iskāt etmekle müvekkilim mûmâ-ileyh Ömer Ağa’dan mezbûr el-Hâc Mustafa Ağa’ya hibe ve teslîm eylediği bâlâda zikr olunan iki elmas yüzük ve bir sîm raht ve sof ferâceye müte‘allıka âmme-i da‘vâdan mezbûr el-Hâc Mustafa Ağa’yı ibrâ ve iskāt eyledi fîmâ-ba‘d birbiri ile zikr olunan husûslara ve sâire müte‘allıka aslâ da‘vâ ve nizâ‘ları kalmayıp her biri âharın zimmetini ibrâ ve iskāt eylediler, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-şehri Recebi’l-ferd li-sene sitte aşere ve mi’e ve elf. Şuhûdü’l-hâl: Ali Ağa b. İbrahim, İbrahim Ağa b. el-Hâc Mustafa, el-Hâc Abdülbaki b. Muslı, el-Hâc Mehmed Ağa b. ( ), Muslı Çelebi berber, Hasan b. Abdullah, Mustafa Çelebi berber.