Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 451 Hüküm no: 466 Orijinal metin no: [113b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Livadiye voyvodası İbrahim Ağa’nın Ağrıboz Valisi Vezir Mükrim Ali Paşa’nın kethüdası olan Ahmed Ağa’ya rüşvet yolu ile vermiş olduğu parayı geri istemesi Sâbıkā Livâdiye voyvodası olup mahmiye-i İstanbul’da Balatkapısı dâhilinde el-Hâc İsa mahâllesi ahâlîsinden İbrahim Ağa b. Ahmed tarafından husûs-ı âti’l-beyana vekîl olduğu el-Hâc Mehmed b. Ahmed ve Süleyman Çavuş b. Abdullah nâm kimesneler şehâdetleriyle şer‘an sâbit ve sübût-ı vekâletine hükm-i-şer‘î lâhık olan İsmail Ağa b. Ahmed nâm kimesne mahmiye-i mezbûrede meclis-i şer‘-i hatîrde sâbıkā Eğriboz Vâlisi Vezîr-i mükerrem Ali Paşa hazretlerinin kethüdâları olan bâ‘isü’l-kitâb Ahmed Ağa b. Dilaver nâm kimesne mahzarında ikrâr ve takrîr-i kelâm edip müvekkilim mezbûr İbrahim Ağa bir husûsun temşiyeti’çün bi-tarîkı’r-rüşve malından dört yüz altmış guruşunu mezbûr Ahmed Ağa’ya def‘ ü teslîm ol dahi yedinden ahz u kabz edip husûs-ı mezbûr vücûda gelmemekle meblağ-ı merkūmu vekâletim hasebiyle bundan akdem mezbûr Ahmed Ağa’dan taleb ve da‘vâ eylediğimde beynimizde münâza‘ât-ı kesîre vâkı‘a olmuşdu el-hâletü hâzihi vesâtet-i muslihîn ile mezbûr Ahmed Ağa benimle da‘vâ-i mezkûrumdan mecmû‘u yüz guruş kıymetli bir kem ayar sîm kemer raht ve bir sîm reşme ve bir sîm topuz ve bir sîm gaddâre ve bir çift Fransız tabancası üzerine sulh oldukda ben dahi sulh-ı mezbûru kabûl ve bedel-i sulh olmak üzere eşyâ-i mezkûreye vekâletim hasebiyle bundan ahz u kabz edip mâ‘adâsı olan üç yüz altmış guruşa müte‘allıka âmme-i da‘vâdan mezbûr Ahmed Ağa’nın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi min-şehri Recebi’l-ferd li-sene sitte aşer ve mi’e ve elf. Şuhûdü’l-hâl: el-Hâc Ahmed b. Receb, Mustafa Ağa b. Mehmed, Süleyman Çelebi b. Abdullah, el-Hâc Mehmed b. Ahmed.