Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 452 Hüküm no: 467 Orijinal metin no: [113b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun ile eşi Ahmed’in muhalaa yolu ile boşanmaları Mahrûse-i Galata muzâfâtından kasaba-i Fındıklı mahâllâtından Molla mahâllesi sâkinelerinden olup zâtı Simkeş imamı Mehmed Efendi b. Mustafa ve Ahmed Beşe b. Abdullah nâm kimesneler ta‘rîfleriyle mu‘arrefe olan Emine bt. Abdullah nâm hatun mahmiye-i İstanbul’da meclis-i şer‘-i enverde zevc-i muhâlı‘ı işbu bâ‘isü’l-vesîka Ahmed b. Abdullah mahzarında ikrâr ve takrîr-i kelâm [edip] zevcim mezbûr Ahmed ile beynimizde hüsn-i zindegânemiz olmamağla zimmetinde mütekarrır ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem üzerine ve meûnet-i süknâm dahi kendi üzerime olmak üzere mezbûr Ahmed ile muhâla‘a-i sahîha-i şer‘iyye ile muhâla‘a olup ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete ve zevciyet beynimizde kāime olduğu hâlde beynimizde olan cemî‘ ahz u i‘tâ ve mu‘âmelât-ı şettâya müte‘allıka âmme-i da‘vâ ve kâffe-i mutâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-Recebi’l-ferd li-sene sitte aşere ve mi’e ve elf. Şuhûdü’l-hâl: Mustafa b. Hasan, Süleyman b. Mustafa, Abdi Çelebi b. Mustafa, Attâr Halil Beşe, el-Hâc Yusuf b. Osman.