Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 452 Hüküm no: 468 Orijinal metin no: [113b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahire’de vefat eden Serdengeçti Hasan Ağa’nın Birun Hazinesi Hazinedarbaşısı Mustafa Ağa’da alacağı olduğu Mahmiye-i İstanbul’da Hoca Rüstem mahâllesi ahâlîsinden olup Mısr-ı Kāhire’de müsâfiren sâkin iken bundan akdem fevt olan Serdengeçti Hasan Ağa b. Ahmed b. Halil’in verâseti zevce-i menkûha-i metrûkesi Âişe bt. Hasan nâm hatun ile babası mezbûr Ahmed’e münhasıra olduğu lede’ş-şer‘ zâhir ve mütehakkık oldukdan sonra mezbûr Ahmed ile mezbûre Âişe Hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘de bi’l-fi‘il Hazîne-i âmire-i bîrûnî hazînedârbaşısı olan işbu bâ‘isü’l-kitâb fahrü’l-akrân Mustafa Ağa b. Hüseyin’in husûs-ı âti’l-beyana vekîl-i şer‘îsi Mehmed Çavuş Ağa b. Mustafa mahzarında her biri ikrâr-ı tam ve takrîr-i kelâm edip mûrisimiz müteveffâ-yı mezbûr Serdengeçti [114a] Ağası Hasan Ağa’nın cihet-i havâle-i şer‘iyyeden müvekkil-i mezbûr Mustafa Ağa zimmetinde dokuz yüz elli guruş hakkı olup meblağ-ı mezbûr beş yüz elli guruşunu hayâtında mezbûr Mustafa Ağa’dan ahz u istîfâ edip bâkī dört yüz guruşunu kable’l-ahz mûrisimiz mezbûr Hasan Ağa fevt olup ırsen bize intikāl etmekle hâlâ meblağ-ı bâkī-i mezbûru müvekkil-i mezbûr Mustafa Ağa’dan talep eylediğimizde ol dahi inkâr etmeğin beynimizde nizâ‘-ı kesîre vâki‘ olmuş idi, el-hâletü hâzihi müvekkil-i mezbûr Mustafa Ağa vesâtet-i muslihîn ile da‘vâ-i mezkûrumuzdan bizi iki yüz guruş üzerine sulh eyledikde biz dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen ahz u kabz ve alâ-kadri hısasinâ beynimizde iktisâm edip bâkī iki yüz guruşa müte‘allıka âmme-i da‘vâ ve kâffe-i mutâlebâtdan müvekkil-i mezbûr Mustafa Ağa’nın zimmetini her birimiz ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene sitte aşere ve mi’e ve elf. Şuhûdü’l-hâl: Ali Efendi b. Mustafa, el-Hâc Mehmed Efendi b. Ahmed, el-Hâc Ali Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kâtib, Mehmed Efendi el-kâtib.