Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 453 Hüküm no: 469 Orijinal metin no: [114a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horişine bt. Rali’nin İstonyina adlı cariyesini azat ettiği Mahmiye-i İstanbul’da Kumkapı dâhilinde Çadırcı Ahmed mahâllesi sâkinelerinden Horişine bt. Rali v. Pulahrani nâm Nasrâniye tarafından husûs-ı âti’l-beyana vekîl olduğu zât-ı mezbûru ma‘rifet-i şer‘iyye ile ârifân olan Eskici Kostantin v. Yamandi ve Çizmeci Nikola v. Milo şehâdetleri ile şer‘an sâbit olan Hıristo v. Nikola nâm zimmî mahmiye-i mezbûrede meclis-i şer‘de müvekkile-i mezbûre Horişine’nin câriye-i memlûkesi uzun boylu açık kaşlı elâ gözlü Sırbiyyetü’l-asl râfi‘atü hâzihi’l-vesîka İstoyina bt. Velâdin nâm Nasrâniye muvâcehesinde bi’l-vekâle ikrâr ve takrîr-i kelâm edip müvekkilem merkūme Horişine câriye-i memlûkesi işbu mevsûfe-i merkūme İstoyinayı malından tahrîr ve i‘tâk ve zümre-i ahrâr-ı asliyâta idrâc ve ilhâk eyledi ba‘de’l-yevm mevsûfe-i mezbûre İstoyina sâir ahrâr-ı asliyât gibi hürre olup üzerinde hakk-ı velâdan gayri müvekkilem mezbûrenin hakkı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-Recebi’l-ferd li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kādı, Mehmed Efendi el-kâtib, Emin Mehmed Efendi el-kādı, el-Hâc Yusuf b. Osman. Balaş v. Kostantin, Vasil v. Yani, Papa Karali v. Rali, Argiri v. İstolo, Mihal v. Damyan.