Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 454 Hüküm no: 470 Orijinal metin no: [114a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şehrî Mehmed Ağa’nın bazı eşya ve alacakları hususunda mirascılar arasında çıkan anlaşmazlıkta sulh olduğu Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden irsâl olunan Mevlânâ el-Hâc Mehmed Efendi b. Ahmed mahmiye-i İstanbul’da Molla Gıyaseddin mahâllesinde el-Hâc Seyfullah Ağa b. el-Hâc Mustafa’nın menziline varıp zeyl-i vesîkada muharrerü’l-esâmi Müslimîn huzûrunda akd-i meclis-i şer‘-i hatîr etdikde mahmiye-i mezbûrede Hâcıoğlu? mahâllesi ahâlîsinden olup bundan akdem vefât eden Şehrî Mehmed Ağa b. Hasan b. Mehmed’in sulbiye kızı ve hasran verâsesi olan Ümmügülsüm Hatun tarafından zevci ve husûsü’l-beyanı taleb ve da‘vâ ve ahz u kabza ve lede’l-iktizâ sulh ve ibrâya ve bunlara mütevakkıf olduğu umûrun küllîsine vekîl olduğu zâtı mezbûru ma‘rifet-i şer‘iyye ile ârifân olan es-Seyyid Mehmed Bey b. es-Seyyid Yusuf ve el-Hâc İbrahim b. Ömer nâm kimesneler şehâdetleriyle mahzar-ı hasm-ı câhid ve şer‘an sâbit ve sübût-ı vekâletine hükm-i şer‘î-i lâhık olan mezbûr el-Hâc Seyfullah Ağa meclis-i ma‘kūd-ı mezbûrda mahmiye-i mezbûrede merhûm ve mağfûrun-leh Sultân Bâyezid Han Câmi‘-i şerîfi kurbünde Mahmud Ağa odalarında sâkin iken vefât eden Mahmud Ağa b. Yusuf’un sulbî kebîr oğulları Osman Çelebi ve Abdullah Çelebi ile sulbiye kebîre kızları Razıye ve Saliha nâm hatunlar tarafından kezâlik husûs-ı âti’l-beyana ve cemî‘ umurlarına [114b] vekâletleri olduğu yedinde mazmûnu müsbet hüccet ile sâbit olan Hasan Beşe b. Abdullah nâm kimesne mahzarlarında ikrâr ve takrîr-i kelâm edip müvekkilem mezbûre Ümmügülsüm’ün babası müteveffâ-yı mezbûr Şehrî Mehmed Ağa eşyâ-i memlûkesinden altmış beş miskāl anber ve dört sîm kemer raht ve üç telli kadife mak‘ad ve döşeme ve iki telli otak kilimi ve bir mücevher sorguç ve bir mücevher istefan ve bir samur parçası kürk ve bir damla? zümrüd hatem ve iki yaldız sîm reşme ve iki som Şam kesmesi müteveffâ-yı mezbûr el-Hâc Mahmud’a îdâ‘ ve teslîm ol dahi yedinden ber-vech-i muharrer ahz u kabz eylediğinden sonra eşyâ-i muharrer-i mezkûreyi mezbûr el-Hâc Mehmed Ağa’dan kable’l-ahz mezbûr Şehrî Mehmed Ağa fevt olup eşyâ-i mezkûre müteveffâ-yı mezbûr el-Hâc Mahmud Ağa zimmetinde kalmağla eşyâ-i muharrere-i mezkûrenin mevcûd ise aynlarını müstehlek ise ba‘de’s-sübût kıymet-i şer‘iyyelerini bundan akdem vekâletim hasebiyle müteveffâ-yı mezbûr el-Hâc Mahmud Ağa’nın terekesinden verese-i mezkûresi olup terekesine vâzı‘ü’l-yed olan oğulları mezbûrân Osman Çelebi ve Abdullah Çelebi ve kızları müvekkiletân-ı mezbûretân Razıye ve Saliha’dan taleb ve da‘vâ eylediğimde onlar dahi husûs-ı mezbûru bi’l-külliye inkâr edip bu vech üzere beynimizde münâza‘ât-ı kesîre ve muhâsamât-ı şedîde cereyân etmişidi el-hâletü hâzihi mezbûrân Osman Çelebi ve Abdullah Çelebi ve müvekkiletân-ı mezbûretân vesâtet-i muslihîn ile benimle da‘vâ-i mezkûremden an-inkâr beş yüz elli guruşa sulh olduklarında ben dahi sulh-ı mezbûru kabûl ve bedel-i sulh olan meblağ-ı merkūm beş yüz elli guruşu yedlerinden tamâmen ahz u kabz edip husûs-ı mezbûra ve zikr olunan Camcı Ali mahâllesinde vâki‘ menzil-i kebîrin semeni olan altı bin guruşa ve bi’l-cümle hukūk-ı ma‘lûme ve mechûleye müte‘allıka âmme-i da‘vâ ve kâffe-i mutâlebâtdan mezbûrân Osman Çelebi ve Abdullah Çelebi ve müvekkiletân-ı mezbûretân Razıye ve Saliha’nın zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ba‘de ba‘s olunan Mustafa b. Abdullah ve Hasan b. Mustafa ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene sitte aşere ve mi’e ve elf. Şuhûdü’l-hâl: es-Seyyid Hasan b. Şa‘bân, el-Hâc Mehmed, Ali Ağa b. Ahmed Ağa, Mehmed Çelebi b. İbrahim, Mehmed Efendi müezzin, İbrahim Çelebi b. Hüseyin.