Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 455 Hüküm no: 471 Orijinal metin no: [114b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşandığı Mustafa Beşe’nin evliyken ev kirasını kendisine ödettiğine dair Fatıma bt. Mehmed’in iddiasının geçersiz olduğu Mahmiye-i İstanbul’da Kürkçü el-Hâc Hüseyin mahâllesinde sâkine Fâtıma bt. Mehmed nâm hatun zâtı ba‘de’t-ta‘rîfi’ş-şer‘î Mehmed mahmiye-i mezbûrede meclis-i şer‘i hatîr-i lâzımü’t-tevkīrde zevci Mustafa işbu bâ‘isü’l-vesîka Mustafa Beşe b. Osman nâm kimesne mahzarında üzerine da‘vâ ve takrîr-i kelâm edip zevcim mezbûr Mustafa Beşe bundan akdem beni tatlîk etdikde zimmetinde mütekarrir ve ma‘kūdün-aleyh olan altı yüz elli akçe mehr-i müeccelim ve nafaka-i iddet-i ma‘lûmem ve meûnet-i süknâmı bana edâ ve teslîm ben dahi yedinden tamâmen ahz u kabz etmişidim. Ve lâkin zevciyet beynimizde kāime iken ma‘an sâkin olduğumuz menzil icâresi için beher mâh on beşer paradan üç senede müctemi‘a olan beş yüz kırk parayı bi-şartı’r-rücû‘ malımdan edâya bana emr etmekle ben dahi emrine binâen sâhibine edâ ve teslîm etmekle hâlâ meblağ-ı mezbûr beş yüz kırk paramı mezbûr Mustafa Beşe’den taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden bi’l-külliye izhâr-ı acz ile istihlâf etmeğin fi’l-vâki‘ menzil-i mezbûrun müddet-i mezbûrede müctemi‘a olan beş yüz kırk para icâresini malından edâ etmek üzere müdde‘iye-i mezbûreye emr eylemediğine mezbûr Mustafa Beşe’ye yemîn teklîf olundukda ol dahi hasbe’l-mesûl yemîn billâhi’l-aliyyi’l-azîm etmeğin mûcibince müdde‘iye-i mezbûre Fâtıma Hatun’u bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, İsmail Efendi b. Sandalcızâde, el-Hâc Yusuf b. Abdullah, Yusuf Beşe b. Abdullah.