Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 456 Hüküm no: 472 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seddülbahir Kalesi dizdarı tarafından darp edilerek öldürülen çamaşırcı Mustafa davasında sulh olduğu Eceâbad kazâsına tâbi‘ Seddülbahr kalesi sükkânından iken bundan akdem fevt olan Câmeşûy Mustafa b. Abdullah’ın verâseti zevcetân-ı metrûketânı Âişe bt. Ahmed ve Fâtıma bt. Hasan nâm hatunlar ile sulbiye kebîre kızı diğer Fâtıma’ya ve sulbiye sagīre kızı Saliha’ya münhasıra olup ba‘dehû sagīre-i mezbûre Saliha dahi fevt olup verâseti vâlidesi mezbûre Fâtıma Hatun ile li-ebin kız karındaşı diğer Fâtıma’ya münhasıra ve mesele-i mîrâsı bi-tarîkı’l-münâsahati’ş-şer‘iyye seksen sehmde olup sihâm-ı mezbûreden beş sehmi mezbûre Âişe Hatuna ve on dokuz sehmi mezbûre Fâtıma ve elli altı sehmi mezbûre diğer Fâtıma’ya isâbeti tahakkukundan sonra zevcetân-ı merkūmetân Âişe Hatun ve Fâtıma Hatun zâtları ma‘rifet-i şer‘iyye ile ârifân Hasan Beşe b. Hüseyin ve Mehmed b. Ahmed ve es-Seyyid Mehmed b. Fethullah ta‘rîfleriyle mu‘arrefe oldukdan sonra mahmiye-i mezbûrede meclis-i şer‘de sâbıkā kale-i mezbûre dizdarı olan işbu râfi‘ü’l-vesîka Ahmed Ağa b. Ali mahzarında her biri ikrâr-ı tam ve takrîr-i kelâm edip işbu mezbûr Ahmed Ağa târîh-i kitâbdan üç sene mukaddem kale-i mezbûrda ucu demirli değnek ile zevcimiz müteveffâ-i mezbûr Câmeşûy Mustafa’nın başına ve arkasına amden darb ve kara bere etdikden mâ‘adâ depme ile kasığına dahi darb edip elli üç gün mürûrunda zevcim mezbûr Câmeşûy Mustafa müteessiren fevt olmağla mezbûr Ahmed Ağa’dan katl-i mezbûrun mûcibini talep ve da‘vâ eylediğimizde ol dahi yedimizde olan hüccet-i şer‘iyyenin mazmûnunu inkâr etmeğin müdde‘âmızı isbât sadedinde iken beynimize muslihûn tavassut edip [da‘vâ-i] mezkûrumuzdan bizi mezbûr Ahmed Ağa ile seksen guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr seksen guruşu yedinden işbu meclisde ahz u kabz ve alâ-kadri hısasinâ beynimizde iktisâm edip katl-i mezbûrun mûcibine müte‘allıka âmme-i da‘vâ ve kâffe-i mutâlebâtdan biz mezbûr Ahmed Ağa’nın zimmetini ibrâ ve iskāt edip mezbûr Ahmed Ağa dahi bedel-i sulh olmak üzere bize medfû‘u olan meblağ-ı mezbûr seksen guruşa müte‘allıka âmme-i da‘vâdan bizim her birimizin zimmetini ibrâ ve iskāt eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-Recebi’l-ferd li-sene sitte aşere ve mi’e ve elf. Şuhûdü’l-hâl: Ali Efendi b. Ahmed Efendi, el-Hâc Mehmed Efendi b. Ahmed Efendi, İsmail Efendi b. el-Hâc Siyavuş, Ömer Efendi el-kādı, Veli Efendi el-kādı, Mehmed Efendi el-kādı, Emin Mehmed Efendi el-kādı.