Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 457 Hüküm no: 473 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferah Hatun’un çocuklarının vasisi ile olan davada sulh olduğu Mahmiye-i İstanbul’da Baklalı mahâllesi sâkinelerinden olup zâtı Abdullah Efendi b. Abdülkadir Efendi ve el-Hâc Ali b. Abdullah nâm kimesneler ta‘rîfleriyle mu‘arrefe olan Ferah bt. Abdullah nâm hatun mahmiye-i mezbûrede meclis-i şer‘de işbu râfi‘ü’l-vesîka Abdurrahman Çelebi b. Mahmud nâm kimesne mahzarında ikrâr ve takrîr-i kelâm edip mezbûr Abdurrahman Çelebi bundan akdem fevt olan sulbî sagīr oğlum Mehmed’in ve sagīre kızım Emetullah ibney Abdullah Efendi nâm müteveffânın tesviye-i emrlerine kıbel-i şer‘den mansûb vasîleri olmağla babaları müteveffâ-yı mezbûr Abdullah Efendi’den intikāl eden terekelerini mezbûr Abdurrahman Çelebi bi’l-vesâye ahz u kabz ve müteveffâ-yı mezbûrun deyn-i müsbetesini ba‘de’l-edâ sagīrân-ı müteveffiyân-ı mezbûrânın ber-mûceb-i defter yedinde bâkī kalan makbûzunu bana def‘ ü teslîm ben dahi ahz u kabz eylediğimden sonra hâric-ez-defter dokuz bin akçe dahi ahz u kabz ve istihlâk etmişidi deyü mezbûr Abdurrahman Çelebi’den taleb ve da‘vâ sadedinde olduğumda beynimizde münâza‘ât-ı kesîre vâkı‘a olmuş idi el-hâletü hâzihi beynimize muslihûn tavassut edip da‘vâ-i mezkûrumdan beni mezbûr Abdurrahman Çelebi ile yirmi guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru tamâmen yedinden ahz u kabz edip oğlum ve kızım müteveffiyân-ı mezbûrânın bi’l-cümle terekesine müte‘allıka âmme-i da‘vâ ve kâffe-i mutâlebâtdan mezbûr Abdurrahman Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min-ba‘d husûs-ı mezkûre müte‘allıka vechen mine’l-vücûh ve sebeben mine’l-esbâb aslâ da‘vâ ve nizâ‘mız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Recebi’l-ferd li-sene sitte aşere ve mi’e ve elf. Şuhûdü’l-hâl: Fahrü’l-kuzât Musazâde Abdullah Efendi, Sandalcızâde İsmail Efendi, el-Hâc Mehmed Efendi el-kādı, Memiş Mehmed Efendi el-kādı, el-Hâc Ali b. Abdullah, el-Hâc Yusuf b. Abdullah.