Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 457 Hüküm no: 474 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskilipli Molla Yakub ile eski İskilip Müftüsü Mehmed Efendi arasındaki borç davası Vilâyet-i Anadolu’da İskilib kasabası ahâlîsinden olup mahmiye-i İstanbul’da Sipâhîler sûkunda Hoca Dursun odalarında müsâfiren sâkin işbu râfi‘ü’l-vesîka Molla Yakub b. Ali nâm kimesne mahmiye-i mezbûrda meclis-i şer-i enverde sâbıkā İskilib müftîsi olan Mehmed Efendi b. Osman nâm kimesne mahzarlarında üzerine da‘vâ ve takrîr-i kelâm edip mezbûr Mehmed Efendi zimmetinde işbu yedimde olan memhûr temessük nâtık olduğu üzere cihet-i karz-ı şer‘den iki yüz guruş hakkım olmağla hâlâ meblağ-ı mezbûru taleb eylediğimde bana edâ ve teslîmden imtinâ‘ eder suâl olunup meblağ-ı mezbûrûn alıverilmesi matlûbumdur, dedikte gıbbe’s-suâl mezbûr Mehmed Efendi cevâbında fi’l-hakīka müdde‘î-i mezbûr Molla Yakub’a yedimde olan memhûr temessükü mûcibince zimmetinde cihet-i karzdan iki yüz guruş vâcibü’l-edâ ve lâzimü’l-kazâ deyni olduğunu ikrâr ve i‘tirâf etmeğin mûcibince meblağ-ı mezbûr iki yüz guruşu müdde‘î-i merkūm Molla Yakub’a edâ ve teslîme mezbûr Mehmed Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâdis min-şehri Recebi’l-ferd li-sene sitte aşere ve mi’e ve elf. el-Hâc Ali Efendi el-kādı, el-Hâc Mehmed Efendi el-kādı, Sandalcızâde İsmail Efendi, el-Hâc Yusuf b. Osman, Veli Efendi el-kādı, Mustafa Çelebi b. Abdullah.