Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 458 Hüküm no: 475 Orijinal metin no: [115b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tımışvar Defterdarı olan Behçetî İbrahim Efendi’nin bazı masrafları karşılığı olarak Mehmed Efendi’ye gönderdiği paranın teslim edildiği Husûs-ı âti’l-beyanın mahâllinde tahrîri için savb-ı şer‘den irsâl olunan Mevlânâ el-Hâc Ali Efendi b. Ahmed mahmiye-i İstanbul’da Emin Bey mahâllesinde vâki‘ umdetü’l-müderrisîni’l-kirâm es-Seyyid Mehmed Efendi b. Es-Seyyid Mustafa Ağa’nın menziline varıp zeyl-i vesîkada muharrerü’l-esâmi Müslimîn huzûrunda akd-i meclis-i şer‘-i kavîm etdikde Dîvân-ı hümâyûn kâtiblerinden olup hâlâ Tımışvâr defterdârı olan umdetü erbâbi’t-tahrîr ve’l-kalem Behçetî İbrahim Efendi b. Ali Efendi b. Mehmed meclis-i ma‘kūd-ı mezkûrda işbu bâ‘isü’l-vesîka müşârün-ileyh es-Seyyid Mehmed Efendi mahzarında ikrâr-ı tam ve takrîr-i kelâm edip işbu müşârün-ileyh es-Seyyid Mehmed Efendi vesâtetiyle mârrü’z-zikr Tımışvar defterdârlığı taraf-ı Devlet-i aliyye’den bana tevcîh ve inâyet buyruldukda mu‘tâd üzere câize ve kalemiye ve sâir masârıf-ı ma‘lûme için üç bin guruşu mahâlline sâhib-i devlet bazâra gidenlerinden işbu hâzır-bi’l-meclis Süleyman Çelebi b. Halil ve etbâ‘ımdan Mehmed Çelebi b. Hasan yedleri ile ben kendim edâ ve teslîm edip müşârün-ileyh es-Seyyid Mehmed Efendi’nin husûs-ı mezbûru husûlüne sa‘y ve tavassutundan mâ‘adâ bir nesne alâka ve medhali olmamağla ber-vech-i muharrer masrûfum olan meblağ üç bin guruşa ve gayra müte‘allıka âmme-i da‘vâ ve kâffe-i mutâlebâtdan müşârün-ileyh es-Seyyid Mehmed Efendi’nin zimmetini ibrâ ve iskāt eyledim min-ba‘d müşârün-ileyh es-Seyyid Mehmed Efendi ile husûs-ı mezbûra ve gayra müte‘allıka vechen mine’l-vücûh ve sebeben mine’l-esbâb aslâ da‘vâ ve nizâ‘ım yokdur dedikde gıbbe’t-tasdîkı’ş-şer‘î mevlânâ-yı mezbûr vâki‘ hâli mahâllinde tahrîr ve ba‘de ma‘an irsâl olunan Şaban Çelebi b. Bayram ile meclis-i şer‘e gelip alâ-vukū‘ıhî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-ferd li-sene sitte aşere ve mi’e ve elf min-hicreti men-lehü’l-izzü ve’ş-şeref. Şuhûdü’l-hâl: Fahrü’l-akrân Mustafa Ağa b. merhûm Nizameddin Efendi, el-Hâc Abdullah Ağa b. Ahmed Ağa ağa-yı Sadr-ı âlî, İbrahim Ağa b. Yusuf, Mustafa Ağa b. Yusuf Ağa, Mehmed Çelebi b. Şaban, Said Efendi b. Mehmed, Fazlullah b. Abdullah.