Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 459 Hüküm no: 476 Orijinal metin no: [115b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarako v. Aslan’ın, İstefani v. Petro’ya kendini ölünceye kadar beslemek şartıyla ucuz fiyata satmış olduğu mülk menzilini geri alması Bâ-imzâ-i Hazret-i veliyyü’n-ni‘am. Mahrûse-i Galata muzâfâtından kasaba-i Kasımpaşa’da Kalafatçıbaşı mahâllesinde sâkin Tarako v. Aslan nâm zimmî mahmiye-i İstanbul’da meclis-i şer‘de işbu râkımü’s-sifr İstefani v. Petro nâm zimmî muvâcehesinde ikrâr ve takrîr-i kelâm edip mahâlle-i mezbûrda vâki‘ bir tarafdan Kasandra nâm zimmî mülkü ve bir tarafdan ba‘zan Krisine ve ba‘zan Mariyora mülkleri ve bir tarafdan Dimitraki nâm zimmî mülkü ve bir tarafdan ba‘zan mekābir ve ba‘zan tarîk-i âm ile mahdûd mekābir tarafında ve tarîk-i âm tarafında vâki‘ iki kıt‘a arsa-i hâliyeyi müştemil mülk-i menzili bundan akdem silk-i mülkümde münselik olmağla menzil-i mahdûd-ı mezkûru mezbûr İstefani yedinde olan bir kıt‘a mubâya‘a hücceti nâtıka olduğu üzere bundan akdem bey‘-i kat‘î ile mezbûr İstefani’ye iki yüz on guruşa bey‘ ve temlîk ve teslîm ol dahi ber-vech-i muharrer ba‘de’l-iştirâ [116a] ve’t-teslîm semen-i mezbûr iki yüz on guruş benim mezbûr İstefani’ye cihet-i deyn-i şer‘îden zimmetimde deynim olan iki yüz on guruşa takās ve mahsûb eylediğimde ol dahi mukāssa ve kabûl edip ol vechile menzil-i mahdûd-ı mezkûr merkūm İstefani’nin mülk-i müşterâsı olup lâkin menzil-i mezkûrun semen-i misli beş yüz guruş olup ve benim menzil-i mezkûru iki yüz on guruşa bey‘im mezbûr İstefani beni ölünceye beslemek şartıyla ve tağrîr [ve] gabn-i fâhiş olmağla bey‘-i mezkûr fâsiddir deyü cihet-i mezkûreden deynim olup semen-i mezkûra takās olunan meblağ-ı mezbûr iki yüz on guruşu mezkûra edâ ve menzil-i mezbûru merkūm İstefani’den taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi, el-hâletü hâzihi beynimize muslihûn tavassut edip da‘vâ-i mezkûremden beni mezbûr İstefani ile on guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on guruşu merkūm İstefani yedinden ahz u kabz edip menzil-i mezkûra ve semenine ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i da‘vâ ve kâffe-i mutâlebâtdan mezbûr İstefani’nin zimmetini ibrâ-yi âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Recebi’l-ferd li-sene sitte aşere ve mi’e ve elf. Şuhûdü’l-hâl: Süleyman Ağa b. Ebubekir, es-Seyyid Fethullah Çelebi b. Mustafa, Mustafa Çelebi b. Mehmed, İbrahim Efendi b. Ataullah, Ali Çelebi b. Abdullah.