Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 460 Hüküm no: 477 Orijinal metin no: [116a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parsam v. Mansur’un Hüseyin b. Şükrullah’a olan borcunu taksitlendireceği Ermeni tâifesinden Parsam v. Mansur nâm zimmî mahmiye-i İstanbul’da meclis-i şer‘-i hatîr-i lâzımü’t-tevkīrde işbu bâ‘isü’l-vesîka el-Hâc Hüseyin b. Şükrullah nâm kimesne mahzarında ikrâr ve takrîr-i kelâm edip mezbûr el-Hâc Hüseyin’e zimmetimde cihet-i deyn-i şer‘îden yüz kırk bir guruş deynim olmağla mezbûr el-Hâc Hüseyin meblağ-ı mezbûra kefilim olan işbu hâzır-bi’l-meclis Mıgırdıç v. Ariton yedinden kırk yedi guruşluk astarını ahz u kabz eylediğinden mâ‘adâ ben dahi kendi malımdan kırk guruşa bir incili serpûş ile on üç guruşa beynimizde levn [ve] zirâ‘ı ma‘lûm sandalımı bey‘ ve teslîm ol dahi ber-vech-i muharrer yedimden iştirâ ve kabz etmekle bu vech üzere min-haysü’-l mecmû‘ yüz guruş deynimi mezbûr el-Hâc Hüseyin’e edâ ve teslîm eylediğimden sonra mezbûr el-Hâc Hüseyin’e zimmetimde kırk bir guruş deynim bâkī kalıp lâkin meblağ-ı bâkī-i mezbûr kırk bir guruşu mezbûr el-Hâc Hüseyin’e def‘aten edâya iktidârım olmayıp taksît ve tecîle tâlib olduğum ecilden mezbûr el-Hâc Hüseyin dahi meblağ-ı bâkī-i mezbûr kırk bir guruşu târîh-i kitâbdan beher ay tamâmında kendüye ikişer guruş vermek üzere yirmi buçuk ay tamâmına değin beni taksît ve tecîl eylediğinden ben dahi ber-vech-i muharrer kabûl ve meblağ-ı bâkī-i mezbûru merkūm el-Hâc Hüseyin’e edâya ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene sitte aşere ve mi’e ve elf. Şuhûdü’l-hâl: Mehmed Efendi bezzâzistânî, Mehmed Çelebi kādızâde, Ahmed Ağa b. ( ), el-Hâc Rukneddinzâde Mehmed Ağa, ve gayruhum mine’l-huzzâr.