Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 460 Hüküm no: 478 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa ve kardeşlerinin, babalarından intikal eden Kirmasti kazasındaki bazı gayrimenkullerini Mahmud Ağa’ya satmaları Mahmiye-i İstanbul’da Cezerî Kasımpaşa mahâllesi sâkinlerinden olup kendi tarafından asil ve li-ebeveyn er karındaşları Ahmed Ağa ve Ebubekir Ağa ve Ali Ağa ve Mustafa Ağa ve İsmail Ağa ebnâ-i Mehmed Ağa nâm kimesneler tarafından husûs-ı âti’l-beyana vekîl olduğu Abdülbaki Bey b. İbrahim ve Ali Hoca b. Osman nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan Osman Ağa nâm kimesne mahmiye-i mezbûrede meclis-i şer‘de fahrü’l-akrân sâhib-i hâze’l-kitâb Mahmud Ağa b. Abdülkadir nâm kimesne mahzarında bil-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin babamız müteveffâ Mehmed Ağa’dan müntakil yedimizde mülk-i mevrûsumuz [116b] olup vilâyet-i Anadolu’da Kirmasti kazâsına tâbi‘ Kayaağaç nâm karyede vâki‘ bir tarafdan el-Hâc Derviş oğlu el-Hâc İbrahim nâm kimesne çiftliği ve bir tarafdan vâdî-i sagīr ve iki tarafdan tarîk-ı âm ile mahdûd harâbe sakfı ve duvarı ve bi’r-i mâ’ ve iki dönüm mikdârı eşcâr-ı müsmire bahçeyi ve bir dönüm mikdârı harman yerini ve yeni çiftlik-i mezbûra muttasıl bir buçuk dönüm bağı müştemil harâba müşrif çiftlik ta‘bîr olunur menzili bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr Mahmud Ağa’ya yüz guruşa bey‘ ve temlîk ve çiftlik-i mezbûra teba‘iyet ile zirâ‘at ve hırâset olunup Kayacık arazisinde ve Tatarhor ve Eminlik ve Kayaağaç arazilerinde vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a tahmînen elli müdd tohum isti‘âb eder arazi ile tahmînen on dönüm mikdârı çayırı bâ-ma‘rifet-i sâhib-i arz dört yüz guruş bedel mukābelesinde kezâlik bi’l-asâle ve bi’l-vekâle mezbûr Mahmud Ağa’ya ferâğ ve tefvîz ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen ve bedeli olan cem‘an beş yüz guruşu mezbûr Mahmud Ağa yedinden asâlet ve vekâletim hasebiyle tamâmen ahz u kabz eyledim, min-ba‘d çiftlik-i mahdûd-ı mezkûr merkūm Mahmud Ağa’nın mülk-i müşterâsı ve arazi-i mezkûre ile çayır ber-vech-i muharrer taht-ı tasarrufunda olup mahâllinde zabt ü kabz ve tasarrufa taslît eyledim, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Recebi’l-ferd li-sene sitte aşere ve mi’e ve elf. Şuhûdü’l-hâl: İsmail Efendi el-kādı, Veli Efendi el-kādı, Mehmed Çelebi b. Mustafa, Abdülbaki Bey b. İbrahim, Ali Hoca b. Osman, Mehmed Ağa b. Abdullah, el-Hâc Yusuf b. Abdullah.