Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 461 Hüküm no: 479 Orijinal metin no: [116b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskilib ahalisinden Molla Yakub’un eski İskilip Müftüsü Mehmed Efendi ve oğlu Osman Efendi’de olan alacaklarını tahsili Vilâyet-i Anadolu’da İskilib kasabası ahâlîsinden olup mahmiye-i İstanbul’da Sipâhîler sûkunda Dursun odalarında müsâfiren sâkin Molla Yakub b. Ali nâm kimesne mahmiye-i mezbûrda meclis-i şer‘de sâbıkā İskilib müftîsi olan Mehmed Efendi b. Osman ve oğlu Osman Efendi nâm kimesneler mahzarlarında ikrâr ve takrîr-i kelâm edip bundan akdem mezbûr Mehmed Efendi zimmetinde cihet-i karzdan iki yüz guruş hakkım olmağla meblağ-ı mezbûru mezbûr Mehmed Efendi bana edâ ve teslîm ben dahi yedinden tamâmen ahz u kabz edip lâkin meblağ-ı mezbûrdan mâ‘adâ kendi zimmetinde cihet-i mezkûreden altmış guruş ve oğlu merkūm Osman Efendi zimmetinde dahi yirmi guruş hakkım olmağla meblağayn-ı mezbûreyni merkūmân Mehmed Efendi ve Osman Efendi’den taleb ve da‘vâ eylediğimde onlar dahi meblağayn-ı mezbûreyni bize hibe ve teslîm biz dahi ittihâb ve kabz ve tesellüm ve istihlâk etmişidik dediklerinde bu vech üzere beynimizde münâza‘ât-ı kesîre cereyân etmişidi, el-hâletü hâzihi mezbûrân Mehmed Efendi ve oğlu Osman Efendi zimmetlerinde müdde‘âm olan meblağayn-ı mezbûreyne müte‘allıka âmme-i da‘vâ ve kâffe-i mutâlebâtdan her birinin zimmetlerini ibrâ-i âmm-ı kātı‘ü’n-nizâ‘ ve râfi‘ü’l-hısâm ibrâ ve iskāt eyledim min-ba‘d husûs-ı mezkûra müte‘allıka mezbûrân ile vechen mine’l-vücûh ve sebeben mine’l-esbâb aslâ da‘vâ ve nizâ‘ım yokdur, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-ferd li-sene sitte aşere ve mi’e ve elf. Şuhûdü’l-hâl: el-Hâc Ali Efendi b. Abdullah, Molla Abdullah b. Mustafa, Usta Mehmed b. ( ), el-Hâc Ömer b. Hasan, Mehmed Beşe er-râcil, Veli Beşe er-râcil.