Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 462 Hüküm no: 480 Orijinal metin no: [116b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Tophane Nâzırı İbrahim Ağa’nın Osman b. İbrahim’e olan borcunu itiraf ettiği Bâ-imzâ-i Hazret-i veliyyü’n-ni‘am. Mahmiye-i İstanbul’da Saray-ı atik kurbünde sâkin işbu râfi‘ü’l-kitâb el-Hâc Osman b. el-Hâc İbrahim nâm kimesne mahmiye-i mezbûrda meclis-i şer‘de sâbıkā Tophane Nâzırı olan el-Hâc İbrahim Ağa b. Hasan nâm kimesne mahzarında üzerine da‘vâ ve takrîr-i kelâm edip mezbûr el-Hâc İbrahim Ağa zimmetinde cihet-i karz-ı şer‘îden bin dört yüz yetmiş guruş ve cihet-i kefâlet-i sahîha-i şer‘iyyeden iki yüz elli bir guruş ki ciheteyn-i mezkûreteynden cem‘an bin yedi yüz yirmi bir guruş hakkım olup meblağ-ı mecmû‘-ı mezkûrun bin iki yüz kırk guruşunu mukaddemâ merkūm el-Hâc İbrahim Ağa yedinden ahz u kabz edip dört yüz seksen bir guruş bâkī kalmağla hâlâ meblağ-ı bâkī-i mezbûru merkūm el-Hâc İbrahim Ağa’dan taleb ederim, suâl olunsun dedikde gıbbe’s-suâl merkūm el-Hâc İbrahim Ağa [117a] cevâbında fi’l-hakīka kazıyye-i vech-i muharrer üzere olup müdde‘î-i mezbûre meblağ-ı mecmû‘-ı mezkûrdan kazbını mu‘terif ol dahi meblağ-ı mezkûr bin iki yüz kırk guruşdan mâ‘adâ meblağ-ı bâkī-i mezbûr dört yüz seksen bir guruş minvâl-i meşrûh üzere el-an zimmetimde vâcibü’l-edâ ve lâzimü’l-kazâ deynimdir deyü tav‘an ikrâr ve i‘tirâf etmeğin alâ-mûcib-i i‘tirâfihî meblağ-ı bâkī-i mezbûr dört yüz seksen bir guruş müdde‘î-i mezbûra edâ ve teslîme merkūm el-Hâc İbrahim Ağa’ya ba‘de’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ min-Recebi’l-ferd li-sene sitte aşere ve mi’e ve elf. Şuhûdü’l-hâl: Mehmed Ağa b. Mahmud, Hasan Ağa b. Mustafa el-Hâc Yusuf b. Abdullah, el-Hâc Osman b. Kemaleddin, Yusuf Ağa b. Abdullah, el-Hâc Ali b. Abdullah ve gayruhum.