Bab Mahkemesi 54 Numaralı Sicil (H. 1102 / M. 1691) cilt: 20, sayfa: 378 Hüküm no: 460 Orijinal metin no: [80b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Mustafa Ağa’nın ölen kardeşi İbrahim Ağa’daki alacağını varislerinden tahsil etmesi Mahmiye-i İstanbul’da Eğrikapı kurbunda el-Hâc İlyas mahallesinde sâkine fahrü’l-muhadderât Emetullah Hâtun bt. el-merhûm Mustafa Ağa tarafından husûs-ı âti’l-beyâna vekîl olup zât-ı mezkûreyi ma‘rifet-i şer‘iyye ile ârifân olan Mahmud Bey b. el-merhûm Hasan Paşa ve Mustafa Çelebi b. Mahmud şehâdetleriyle şer‘an vekâleti sâbite olan kebîr oğlu İbrahim Bey b. Hasan Paşa meclis-i şer‘-i şerîf-i enverde, yine müvekkile-i mezbûrenin birâderi olup mukaddemâ vefât eden İbrahim Ağa’nın hasran vârisleri olup kendi tarafından asîl ve hemşîresi Emine Hanım tarafından husûs-ı âti’l-beyâna vekîl-i sâbitü’l-vekâlesi Süleyman Ağa mahzarında ikrâr-ı tâm ve [takrîr-i] kelâm edip, müvekkilem mezbûre Emetullah Hâtun’un karındaşı merkūm İbrahim Ağa zimmetinde cihet-i deyn-i şer‘îden beş yüz esedî guruş hakkı olup, kable’l-edâ mezbûr İbrahim Ağa fevt olup tereke-i vâfiyesine merkūmân vaz‘-ı yed etmişler idi. El-hâletü hâzihî mezbûr Süleyman Ağa meblağ-ı mezbûr beş yüz guruşu ve müvekkilem mezbûreye edâ ve teslîm, ol dahi ahz u kabz ve tesellüm edip, meblağ-ı mezbûr beş yüz guruşdan merkūmân Süleyman Ağa ve Emine’de bir akçe ve bir habbesi kalmamışdır dedikde, gıbbe’t-tasdîki’l-mu‘teberi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire sene 1102. Şuhûdü’l-hâl: İbrahim Çelebi b. Abdülbâki, Mehmed Bey b. Cafer, el-Hâc Hüseyin b. Abdullah, Mahmud Bey b. Hasan Paşa, Mustafa Çelebi b. Mahmud.