Bab Mahkemesi 54 Numaralı Sicil (H. 1102 / M. 1691) cilt: 20, sayfa: 378 Hüküm no: 461 Orijinal metin no: [80b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Murad b. Ahmed’in malının üçte birini Hacı Osman Vakfı’na vakfetmesi Vilâyet-i Anadolu’da Eğin Kazâsı’na tâbi‘ Şirzi nâm karyede vâki‘ ashâb-ı hayrâtdan el-Hâc Osman nâm sâhibü’l-hayrın mescid-i şerîf ve sâir evkāfına mütevellî olan İbrahim Ağa b. el-Hâc Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde, fi’l-asl karye-i mezkûre ahâlîsinden olup mahmiye-i İstanbul’da Gül Câmi‘-i Şerîfi mahallesinde sâkin iken bundan [akdem] vefât eden Kömürcü el-Hâc Murad b. Ahmed’in vesâyâsını tenfîze vasiyy-i muhtârı olmağla, zikri âtî meblağa vâzı‘u’l-yed olduğu sâbit olan işbu bâ‘isü’l-kitâb İsmail Çelebi b. Mehmed mahzarında bi’t-tevliye takrîr-i kelâm ve ta‘bîr ani’l-merâm edip, mezbûr el-Hâc Murad mukaddemâ hayâtında ba‘de mevtihî isâbet ile sülüs mâlından karye-i mezbûrede vâki‘ mârru’z-zikr el-Hâc Osman Câmi‘i’nin imâm ve hatîb ve müezzin ve kayyım ve mekteb halîfesine nemâsı vazîfe olmak üzre vasiyyet ve ta‘yîn eylediği elli bin akçelik mangırı merkūm el-Hâc Murad’ın vasiyyeti üzre vasîsi mezbûr İsmail Çelebi b. ( ) bana teslîm, ben dahi bi’t-tevliye ahz u kabz ve tesellüm eyledim, meblağ-ı mezbûrdan vasiyy-i mezkûr yedinde bir akçe ve bir habbe kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. [81a] Fi’l-yevmi’s-sâbi‘ ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Mehmed Efendi b. İsmail imâm-ı Gül Câmi‘i, Ömer Efendi b. Mustafa imâm-ı tekye, es-Seyyid Mehmed Efendi b. Abdülkādir, Mehmed b. Müstedâm, Süleyman Ağa b. Bayezid, Selim Bey b. Ali, Şaban b. Abdullah, Mehmed Çelebi b. İsmail, İbrahim Çelebi b. Mehmed. Mâ fîh kemâ yahvîhi el-Müvellâ-hılâfe bi medîne-i Kostantıniyye el-mahmiye. -Ufiye anhümâ-