Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 463 Hüküm no: 481 Orijinal metin no: [117a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kilidbahir Kalesi sakinelerinden Saliha Hatun’un Kilidbahir’deki alacaklarını tahsil için Mehmed’i vekil tayin ettiği Eceâbad kazâsına tâbi‘ Kilidü’l-bahr kalesi sâkinelerinden olup hâlâ medîne-i Galata[da] müsafereten sâkine ve zâtı ta‘rîf-i şer‘î ile mu‘arrefe olan Saliha Hatun bt. Abdullah b. Abdülmennan mahmiye-i İstanbul’da meclis-i şer‘de işbu râfi‘ü’l-vesîka es-Seyyid Mehmed b. es-Seyyid Fethullah mahzarında ikrâr ve takrîr-i kelâm edip bundan akdem kal‘a-i mezbûre dizdarı İsmail nâm kimesne zimmetinde yüz otuz şerîfî altın ve on beş guruş ve bir çift altın bilezik ve bir çift inci askılı zümrüd küpe ve kassâm-ı emîr demekle ma‘rûf kimesnede olan yedi guruşumu ve sâir zimem-i nâsda olan hukūkumu mezbûrlardan taleb ve da‘vâ ve ahz u kabza ve bana îsâle ve ahz u kabz ve isâlin mütevakkıf olduğu umûrun küllîsine tarafımdan Ahmed nâm kimesneyi vekîl ve nâib-i menâb nasb u ta‘yîn etmişidim el-hâletü hâzihi mezbûr Ahmed’i vekâlet-i mezbûreden azledip yerine mezbûr Dizdar İsmail’de olan mârrü’z-zikr yüz otuz şerîfî altın ve on beş guruş bilezik ve bir çift askılı zümrüd küpemi ve mezbûr kassâm-ı emîrde olan yirmi guruş hakkımı ve sâir zimem-i nâsda olan hukūkumu mezbûrlardan taleb ve da‘vâ ve ahz u kabza ve bana îsâle ve ahz u kabz ve îsâlin mütevakkıf olduğu umûrun küllîsine işbu mezbûr es-Seyyid Mehmed’i tarafımdan vekîl ve nâ’ib-i menâb nasb u ta‘yîn eyledim dedikde mezbûr es-Seyyid Mehmed dahi vekâlet-i merkūmeyi kabûl ve merâsimini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene sitte aşere ve mi’e ve elf. Şuhûdü’l-hâl: Fahrü’l-kuzât İbrahim Efendi b. Mehmed Efendi, el-Hâc Ali Efendi b. Ahmed Efendi, el-Hâc Mehmed Efendi b. Ahmed Efendi, İsmail Efendi el-kādı.