Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 463 Hüküm no: 482 Orijinal metin no: [117a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed Ağa’nın menzilini zevcesine satması Mahmiye-i İstanbul’da Çakırağa mahâllesinde sâkin fahrü’l-eşbâh Derviş Mehmed Ağa b. el-Hâc Ali mahmiye-i mezbûrda meclis-i şer‘-i hatîrde zevcesi bâ‘isetü’l-kitâb Hadîce bt. Abdullah nâm hatun tarafından ikrâr ve câ’i’z-zikri tasdîka vekîl-i şer‘îsi olan Halil Efendi b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahâlle-i mezbûrda vâki‘ bir tarafdan Firârî Hüseyin Paşa sarayı ve bir tarafdan Mustafa Ağa menzili ve bir tarafdan bostan ve bir tarafdan tarîk-i âm ile mahdûd hâriciyesinin tabaka-i ulyâsında iki bâb oda ve bir yan sofası ve bir cihân-nümâ ve dehliz ve tabaka-i vüstâsında iki bâb oda ve bir yan sofası ve âbdesthâne ve kenîf ve dehliz ve tabaka-i süflâsında bir ahır ve kenîf ve bi’r-i mâ’ ve bahçe ve havlu dâhiliyesinde fevkānî bir kebîr oda ve bir sagīr oda ve bir mâbeyn odası ve iki sofa ve dehliz ve tahtânî bir bâb oda ve bir matbâh ve gasilhâne ve kenîf ve bi’r-i mâ’ ve bir bahçe ve havluyu müştemil menzilimi bi-cümleti’t-tevâbi‘ [117b] ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile bin iki yüz guruşa zevcem müvekkile-i mezbûre Hadîce Hatun’a bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eylediğimden sonra semeni olan meblağ-ı mezbûr bin iki yüz guruşu zevcem müvekkile-i mezbûre Hadîce Hatun yedinden tamâmen ahz u kabz eyledim fîmâ-ba‘d menzil-i mahdûd-ı mezbûr zevcem müvekkile-i mezbûre Hadîce Hatun’un mülk-i müşterâsıdır. Keyfemâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-şehri Recebi’l-ferd li-sene sitte ve aşere ve mi’e ve elf. Şuhûdü’l-hâl: Mehmed Efendi imam-ı Câmi‘-i Sultân, el-Hâc Hasan Efendi b. Mustafa, Mehmed Efendi hoca, Ali Çelebi b. Abdi, Ali b. Mehmed, Mustafa Beşe, Mahmud Beşe.