Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 466 Hüküm no: 484 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağrıboz Ağası Haseki Mustafa Ağa’nın tüccardan Menteş adlı Yahudiye olan borçlarını ödediği Yeniçeri Ocağı’ndan olup sâbıkā İnebahtı Ağası ve hâlâ Ağrıboz Ağası olan fahrü’l-eşbâh Haseki Mustafa Ağa b. Ali b. Mustafa mahmiye-i İstanbul’da meclis-i şer‘de tüccârdan işbu râfi‘ü’s-sifr Menteş v. Salamon nâm Yahûdî muvâcehesinde ikrâr-ı tam ve takrîr-i kelâm edip işbu merkūm Menteş bundan akdem yedine verdiğim bir kıt‘a deyn temessükü mantûkunca karz-ı şer‘îden ve yedinden iştirâ ve kabz eylediğim emti‘â-i ma‘lûme semenlerinden min-haysü’l-mecmû‘ dört bin beş yüz guruş deynim olup meblağ-ı mezbûrun üç bin iki yüz guruşunu mezbûr Menteş’e edâ ve teslîm ol dahi yedimden ba‘de’l-ahz müceddeden yedine verdiğim deyn temessükü mûcibince bâkī-i mezbûr Menteş’e zimmetimde vâcibü’l-edâ ve lâzimü’l-kazâ bin üç yüz guruş deynim olup ber-vech-i muharrer deynim olan meblağ-ı bâkī mezbûr bin üç yüz guruşdan mâ‘adâ târîh-i kitâba gelince beynimizde cereyân eden ahz u kabz ü i‘tâ ve mu‘âmelât-ı şettâ ve gayra müte‘allıka âmme-i da‘vâ ve kâffe-i mutâlebâtdan ben mezbûr Menteş’in zimmetini ibrâ ve iskāt edip mezbûr Menteş dahi ber-vech-i muharrer benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi aşer min-Recebi’l-ferd li-sene sitte aşere ve mi’e ve elf. Şuhûdü’l-hâl: Umdetü erbâbi’t-tahrîr ve’l-kalem Ali Efendi başyazıcı, Hasan Beşe tâbi‘-i Ali Efendi, Ali Beşe Çukadâr, Ali Çelebi kâtib, Mehmed Beşe [b.] Emin, Çukadâr Ahmed Çelebi, Ali Efendi b. Ahmed, el-Hâc Mehmed Efendi b. Ahmed, İsmail Efendi el-kādı.