Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 467 Hüküm no: 485 Orijinal metin no: [118a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin Musa Ağa’ya olan borcunu ödemesi Mahmiye-i İstanbul’da Nahılbend mahâllesi ahâlîsinden işbu râfi‘ü’l-vesîka Musa Ağa b. İsa mahmiye-i mezbûrda meclis-i şer‘de duhâncı tâifesinden Halil Beşe b. İbrahim mahzarında üzerine da‘vâ ve takrîr-i kelâm edip işbu mezbûr Halil Beşe zimmetinde bi’d-defa‘ât yedimden iştirâ eylediği duhân varakı semeninden yüz doksan buçuk guruş hakkım olup meblağ-ı mezbûrun doksan altı buçuk guruşunu yedinden ahz u istîfâ edip doksan dört guruşu zimmetinde bâkī kalmağla hâlâ meblağ-ı bâkī-i mezbûr doksan dört guruşu mezbûr Halil Beşe’den taleb eylediğimde edâdan imtinâ‘ eder suâl olunup meblağ-ı bâkī mezbûrdan alıverilmesi matlûbumdur dedikde gıbbe’s-suâl mezbûr Halil Beşe cevâbında fi’l-vâki‘ müdde‘î-i mezbûr Musa Ağa’ya yedinden iştirâ ve kabz eylediği duhân varakı semeninden bâkī zimmetinde doksan dört guruş deyni olduğunu ikrâr ve i‘tirâf etmekle mûcibince meblağ-ı bâkī mezbûr doksan dört guruş müdde‘î-i mezbûr Musa Ağa’ya edâ ve teslîme mezbûr Halil Beşe’ye ikrâr ve i‘tirâf etmekle mûcibince meblağ-ı bâkī-i mezbûr doksan dört guruş müdde‘î-i mezbûr Musa Ağa’ya edâ ve teslîme mezbûr Halil Beşe’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis aşere min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Ali? Efendi b. Ahmed, el-Hâc Mehmed Efendi b. Ahmed, İsmail Efendi b. Siyavuş, Ömer Efendi el-kādı, Mehmed Efendi el-kādı, el-Hâc Yusuf b. Osman.