Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 467 Hüküm no: 486 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin ve eşinin, oğulları Vasil’i katletmekle itham ettikleri şahıslarla ilgili davadan feragat etmeleri Balıkçı tâifesinden olup mahmiye-i İstanbul hısnı ebvâbından Cibâli kapısı hâricinde sâkin iken balık avına gidip târîh-i kitâbdan beş ay mukaddem gaybet-i munkatı‘a ile gāib olup hayât ve memâtı ma‘lûm olmayıp mefkūd hükmünde olan Vasil v. Kostantin v. Sanaf nâm zimmînin babası merkūm Kostantin ile anası Döndü bt. Kostantin nâm Nasrâniye ba‘de’t-ta‘rîf mahmiye-i mezbûrda meclis-i şer-i hatîrde yine tâife-i mezbûrdan bâ‘isü’s-sifr Anastaş v. Angel ve Kostantin v. Monol ve Yemandi v. Hürmüz nâm zimmîler muvâcehesinde her biri ikrâr ve takrîr-i kelâm edip oğlumuz Vasil târîh-i mezbûrda işbu hâzirûn bi’l-meclis olan merkūmûn Anastaş ve Kostantin ve Yemandi ile gāibûn ani’l-meclis Dimitri ve Todori ve Todorako ve Yorgi ve diğer Kostantin ve diğer Anastaş ile ma‘an balık avına gidip gāib olmağla oğlumuz merkūm Vasili sırren katleylediniz deyü bundan akdem biz işbu merkūmûn Anastaş ve Kostantin ve Yemandi ile gāibûn-ı merkūmûndan da‘vâ eylediğimiz de onlar dahi husûs-ı mezbûru bi’l-külliye inkâr edip bu vech üzere beynimizde münâza‘ât-ı kesîre ve muhâsamât-ı şedîde olmuş idi el-hâletü hâzihi biz da‘vâ-i mezkûrumuzdan fâriğ olup oğlumuz merkūm Vasil’in dem ü diyetine müte‘allıka âmme-i da‘vâ ve kâffe-i mutâlebâtdan işbu hâzirûn-ı merkūmûn Anastaş ve Kostantin ve Yemandi ile gāibûn-ı mezbûrûn Dimitri ve Todori ve Todorako ve Yorgi ve diğer Kostantin ve diğer Anastaş’ın zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledik, fîmâ-ba‘d merkūmûn ile husûs-ı mezbûra müte‘allıka aslâ da‘vâ ve nizâ‘ ve husûmetimiz kalmadı dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi aşere min-şehri Recebi’l-ferd li-sene sitte aşere ve mi’e ve elf. Şuhûdü’l-hâl: Nalband Yusuf b. Abdullah, Süleyman b. Sefer, Hüseyin b. Halil, Şaban Çelebi el-mübâşir.