Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 468 Hüküm no: 487 Orijinal metin no: [118b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’dan İran’a giderken yolda vefat eden Nahçıvanlı Niyaz’ın zimmeti ve sair hukukunun varisleri adına Yusuf Çelebi tarafından takip edilmesi Fi’l-asl Vilâyet-i Acem’de medîne-i Nahçıvan’a tâbi‘ Üsküb nâm karye ahâlîsinden olup mahmiye-i İstanbul’dan diyâr-ı Acem’e gider olduğu hâlde esnâ-i tarîkde fevt olan el-Hâc Niyaz b. Reşid b. Behrâb nâm kimesnenin verâseti sulbiye kızı Zeyneb ile li-ebeveyn karındaşı Mehmed Zemân nâm kimesneye münhasıra olduğu şer‘an zâhir oldukdan sonra sagīre-i mezbûrenin kıbel-i şer‘den mansûb ve vasîsi olan mezbûr Mehmed Zemân mahmiye-i mezbûrda meclis-i şer‘de müteveffâ-yı mezbûrun mahmiye-i mezbûrda ve sâir diyârda zimem-i nâsda olan hukūkûnu ve eşyâsını ahz u kabz ve düyûn-ı müsbetesini edâya ve fazlasını veresesine îsâle hüccet-i şer‘iyye ile vasiyy-i muhtârı olan işbu bâ‘isü’l-vesîka Yusuf Çelebi b. el-Hâc Hasan nâm kimesne mahzarında bi’l-asâle ve bi’l-vesâye ikrâr ve takrîr-i kelâm edip mezbûr Yusuf Çelebi karındaşım müteveffâ-yı mezbûrun ber-vech-i muharrer mahmiye-i mezbûrda ve sâir diyârda zimem-i nâsda olan hukūkunu ve eşyâsını ahz u kabza ve düyûn-ı müsbetesini edâya ve fazlasını veresesine îsâl ve teslîme işbu yedinde olan hüccet-i şer‘iyye mûcebince vasiyy-i muhtârı olmağla zimem-i nâsda olan hukūkunu ve tereke-i sâiresini bi’l-vesâye ba‘de’l-kabz mahmiye-i mezbûrda Dülgerzâde mahâllesinde sâkin gāib ani’l-meclis Bektaş Beşe b. Halil nâm kimesnenin âhar karındaşım olup karındaşım müteveffâ-yı mezbûr Niyaz’dan mukaddem vilâyet-i Rumeli’nde kasaba-i İslimye’de fevt olan Yusuf nâm kimesne zimmetinde yedinde olan memhûr temessükü mûcibince yedi yüz elli guruş hakkı olup meblağ-ı mezbûru merkūm Bektaş Beşe’ye kable’l-edâ karındaşımız merkūm Yusuf fevt olup tereke-i vâfiyesini karındaşım müteveffâ-yı mezbûr el-Hâc Niyaz hayâtında kabz eyledikden sonra meblağ-ı mezbûru merkūm Yusuf’un terekesinden mezbûr Bektaş Beşe’ye edâ ve teslîm etmeğin ben mezbûr el-Hâc Niyaz dahi fevt oldukda merkūm Bektaş Beşe işbu hüccet-i şer‘iyye nâtıka olduğu üzere meblağ-ı mezbûru vasiyy-i merkūmdan huzûr-ı hâkimü’ş-şer‘de da‘vâ ve müdde‘âsını şuhûd-ı udûl ile muvâcehesinde ba‘de’l-isbât ve’l-half ve’l-hükm vasiyy-i merkūm Yusuf Çelebi karındaşım müteveffâ-yı mezbûrun terekesinden mezbûr Bektaş Beşe’ye meblağ-ı mahkûmün-bih-i mezbûrun dört yüz elli guruş nakid ve yirmi beş guruş mukābelesinde dahi iki top fetevâyı ve iki donluk orta şâhî alaca def‘ ü teslîm ol dahi ahz u kabz ve mâ‘adâsı olan iki yüz yetmiş beş guruşa müte‘allıka âmme-i da‘vâdan müteveffiyân-ı mezbûrânın veresesinin her birinin zimmetini ibrâ ve iskāt etmişidi, hâlâ vasiyy-i merkūm Yusuf Çelebi yedinde karındaşım müteveffâ-yı mezbûrun terekesinden ancak doksan dört guruş bâkī kalmağla meblağ-ı bâkī-i mezbûru bana tamâmen def‘ ü teslîm ben dahi bi’l-asâle ve bi’l-vesâye ahz u kabz edip husûs-ı mezkûra müte‘allıka âmme-i da‘vâdan mezbûr Yusuf Çelebi’nin zimmetini bi’l-asâle ibrâ eyledim, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi aşer min-Recebi’l-ferd li-sene sitte aşere ve mi’e ve elf. Şuhûdü’l-hâl: Abdullah Çelebi b. Ebubekir, Hüseyin Çelebi b. Ali, Süleyman Çelebi b. Mehmed, Mehmed Çelebi b. el-Hâc Ali.