Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 469 Hüküm no: 488 Orijinal metin no: [119a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe adlı şahsın, parasını haksız yere aldığı gerekçesiyle dava açan Rumeli’de Opar kazası ahalisinden Koçi’nin gerçekte Ali Beşe’ye borçlu olduğunun anlaşıldığı Vilâyet-i Rumeli’nde Opar kazâsına tâbi‘ Kitikaş nâm karye ahâlîsinden Koçi v. Ledo? nâm zimmî mahmiye-i İstanbul’da meclis-i şer‘de işbu râfi‘ü’l-vesîka Ali Beşe b. Hasan mahzarında üzerine da‘vâ ve takrîr-i kelâm edip işbu mezbûr Ali Beşe bundan akdem bi-gayrı hakkın on beş guruşumu ahz u kabz etmekle hâlâ meblağ-ı merkūmu mezbûr Ali Beşe’den taleb eylediğimde edâdan imtina‘ eder su’âl olunup alıverilmek matlûbumdur dedikde gıbbe’s-suâl mezbûr Ali Beşe cevâbında fi’l-vâki‘ müdde‘î-i mezbûr Koçi yedinden on beş guruş ahz u kabz eylediğini ikrâr lâkin müdde‘î-i mezbûr merkūm Koçi zimmetinde yedimden iştirâ ve kabz eylediği bir kebîr kazgan semeninden elli beş guruş hakkım olmağla meblağ-ı mezbûr on beş guruşu bana deyn-i mezbûra mahsûben edâ ve teslîm ben dahi yedinden ber-vech-i muharrer ahz u kabz etdiğimden sonra kırk guruşu zimmetinde bâkī kalıp hattâ cihet-i merkūmeden bana elli beş guruşunu târîh-i kitâb şehrinin yedinci günü mahmiye-i mezbûrede Mahmudpaşa mahkemesinde bi’l-fi‘il nâ’ibü’ş-şer‘-i şerîf olan Mevlânâ Abdullah Efendi huzûrunda merkūm Koçi muvâcehesinde şuhûd-ı udûl ile ba‘de’l-isbât meblağ-ı bâkī-i mezbûr kırk guruşu dahi bana edâ ve teslîm merkūm Koçi’ye tenbîh birle kıbel-i şer‘den yedime hüccet-i şer‘iyye dahi verilmişidi deyü def‘le mukābele ve mazmûnu takrîririne mutâbık ve mevlânâ-yı mezbûrun imzâ ve hatemini hâviye ve târîh-i mezbûr ile müverreha bir kıt‘a hüccet ibrâz etdikde gıbbe’l-istintâk Koçi mazmûn-ı hüccet-i mezbûreyi ikrâr ve i‘tirâf etmeğin mûcebince meblağ-ı bâkī-i merkūm kırk guruşu mezbûr Ali Beşe[ye] edâ ve teslîme merkūm Koçi’ye tenbîh birle mâ-vaka‘a bi’t-taleb ketb olundu. Fi’l-yevmi’r-râbii aşere min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Ali Efendi b. Ahmed Efendi el-Hâc Mehmed Efendi b. Ahmed Efendi, İsmail Efendi el-kādı, Ömer Efendi el-kādı, Veliyüddin Efendi el-kādı, Mehmed Efendi el-kādı, el-Hâc Yusuf b. Osman.